SECOMS Agradese Inisiativa Tour Jornalístiku AJTL, TLPU, UPJTL nian ba Área Rurál

DILI (MÍDIA SECOMS) — Sekretáriu Estadu Komunikasaun Sosiál (SECOMS) Expedito Loro Dias Ximenes, agradese ba Presidente Asosiasaun Jornalista Timor Lorosa’e (AJTL), Timor Leste Press Union (TLPU), Uniaun Profesional Jornalista Timor Leste (UPJTL) no membru sira hotu ba inisiativa Tour Media ba área rurál.

Expedito Loro Dias Ximenes konsidera jornalista sira la’ós de’it serbisu iha redasaun, maibé mós iha komitmentu atu hatene moris reál povu nian iha baze.

“Media hanesan ponte. Governu sei kontinua apoia programa sira hanesan ne’e, maski orsamentu ki’ik, no Governu garante sei la interven polítika editóriál,” SECOMS hatete.

Sekretáriu Estadu ne’e mós husu jornalista sira atu eduka públiku kona-ba uza Inteligénsia Artifisiál (AI) ho responsabilidade no étika, liu-liu ba foin-sa’e sira ne’ebé uza media sosiál.

Ligadu ho Komemorasaun Loron Liberdade Imprensa loron 16 fulan-Outubru, governante ne’e husu ba Konsellu Imprensa no Governu atu serbisu hamutuk.

Governu reafirma kompromisu atu garante liberdade espresaun no liberdade imprensa, livre hosi intervensaun podér polítiku no ekonómiku.