SEKOMS husu Instituisaun Mídia sira atu fornese informasaun ne’ebe klaru ba Komunidade Sira.

Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o afirmasaun ne’e, bainhira ofisiálmente abertura ba aprezentasaun rezultadu final survey nasionál persepsaun públiku kona-ba mídia estatal no mídia privada iha Timor-Leste, kinta-feira, loron 14 fulan-outubru tinan-2021, iha sala reuniaun PCM-Palásiu Governu, Dili.

Iha serimónia ne’e, Merício Juvinal Dos Reis ” AKARA” hateten katak Survey ne’ebé SEKOMS hala’o iha teritóriu Timor laran tomak ho objetivu katak atu hatene porsentu hira populasaun konsumu informasaun husi mídia estatál no mídia privadu

“AKARA”, afirma tan, SEKOMS hala’o Survey ne’e hodi identifika populasaun ka sidadaun asesu informasaun barak liu husi mídia estatál ka privadu atu nune’e Governu bele apoia mídia sira hotu ne’ebé eziste iha rai laran hodi nune’e bele divulga imformasaun ne’ebé saúdavel kredivel no los ba iha komunidade iha rai laran no mós iha estranjeiru.

Iha Fatin hanesan Ezekutivu husu Instituisaun Mídia sira hotu atu fornese imformasaun ne’ebe klaru no justu ba Komunidade Sira

“Mídia Mak sai hanesan Liman ain estadu no ema hotu-hotu nian hodi públika ba públiku espresaun, atividade, talentu servisu hotu ne’ebé ita hala’o iha moris loron-loron, liu-liu iha atividade Governu nian ba Dezenvolvimentu estadu no ba rai ida ne’e. Survey ne’e hala’o maske seidauk maximu maibé iha informasaun sufisiente hodi fornese ba públiku atu garantia informasaun hotu ne’ebé mídia sira fornese ba Ita hotu”.

Governante ne’e realsa, ba oin SEKOMS nafatin servisu hamutuk ho mídia sira hotu atu garantia kualidade informasaun ne’ebe di’ak liu ba públiku.

Iha Sorin seluk Tékniku Profisionál Mídia SEKOMS, Carsiliano Oliveira esplika katak Survey ne’e halo hanesan sasukat ida ba mídia sira hotu atu mídia ida-idak hatene porsentu hira mak populasaun sira asesu ba Sira media rasik.

“Levantamentu ne’ebé SEKOMS hala’o ne’e fo inspirasaun di’ak ba mídia Sira atu bele haboot Liu tan Sira nia informasaun ba Públiku Liu husi programa ka atividade ne’ebé mídia sira fornese” dehan Carsiliano.