Maubise-14/10/2022, Sekretáriu Estadu ba Komunikasaun Sosiál, Sr. Merício Juvinal dos Reis “AKARA”, Konvida Verbál Husi Uma Lisan “Hatilu”, Wainhira Hasoru Direta Benefisiáriu Programa Empoderamentu Feto, Iha Suku Maubise, Postu Administrativu Maubise, Munisípiu Ainaro.
Tuir dalan nain ba uma lisan “Hatilu”, simu ho kultura lisan maubisse nian katak, simu Governante ho nia komitiva ho ksolok tanba Governante ida ho laran di’ak tebes no neon popular hodi vizita nia ema iha sira nia hela fatin.
Tuir Sekretáriu Estadu ba Komunikasaun Sosiál, Sr. Merício Juvinal dos Reis “AKARA”, hateten, nu’udar Umanu sente ksolok tebes vizita nia maluk sira hanesan soliedariedade ne’ebé mak iha kontextu kultura Timor-Leste nian. Nu’udar mós membru Governu ida iha dever no morál atu vizita nia povu sira ne’ebé mak presiza tebes prezensa iha sira nian klaran hodi ko’alia ho sira.
Vizita ne’e uniku, maibé pasa parte ba lasu amizade ne’ebé mak beiala sira halo ona, nu’udar Timor Oan Vizita malu wainhira bolu husi uma nain ida tanba lisan no kultura Timor-Leste nian.
“Uniku tebes tanba ohin hanesan surpreza no orgullu ida mai ha’u, nu’udar membru Governu ne’ebé hetan Konvite Verbál hodi mai vizita uma lisan “Hatilu” ida ne’e. VIII Governu Konstituisionál mós nia programa mak pro ba povu deit nune’e obrigasaun ona wainhira hetan bolu iha dalan ita simu ho fuan bo’ot ba haree sira nia fatin”. dehan “AKARA”.
Iha dalan Sua Ex.cia. ho komitiva simu, no hananu no tebe kultura maubisse nian, ala serigala. Sua Exia hamutuk to’o iha fatin, hetan mós matak malirin no look bua malus ho tabaku Timor ba malu nu’udar identidade Timor-Leste nian, hanesan lia menon ida katak, ukun tenki ho fuan no domin boot tanba ukun nia nain mak povu.
Tuir nain ba uma lisan Manuel Perreira hateten katak, sente orgullu no kontente tebes bolu Governante iha dalan deit, maibé mai kedas atu mai vizita ami nia uma lisan ne’e hanesan grasa ida mai ami nia uma lisan ne’e.
“Ami sente kontente loos, tanba hetan bainaka espesiál ida ne’ebé mai spontan hodi haree no observa direta uma lisan “Hatilu” fatin liurai Tararehi nian”
Nain ba uma lisan “Hatilu” mos akresenta liutan katak, fatin ne’e agora dadaun uma lisan “Hatilu” harii ba ne’e, nu’udar rai husar Timor-Leste nian. Husi lorosa’e to loromonu nia husar mak iha fatin refere no husi tas feto to tasi mane nia husar mak ida ne’e.
Maubise hanesan mane ida ne’ebé barani ho domin simu ema hotu husi rai ulun no rai ikun nomós hadomi ema laharee ba koor no rasa ne’e mak koñesidu ho naran “Maubise Mauloko”.
Wainhira Sekretáriu Estadu ba Komunikasaun Sosiál, Sr. Merício Juvinal dos Reis “AKARA”, no komitiva atu fila nain ba uma lisan “Hatilu” ho nia emar sira hamrik hodi dahur no tebe ho sentidu katak, bainaka espesiál atu fila ona ba nia fatin.
Comment