𝐊𝐚𝐦𝐩𝐚𝐧̃𝐚 𝐒𝐞𝐧𝐬𝐢𝐛𝐢𝐥𝐢𝐳𝐚𝐬𝐚𝐮𝐧 𝐋𝐢𝐭𝐞𝐫𝐚𝐬𝐢𝐚 𝐃𝐢𝐣𝐢𝐭𝐚́𝐥” 𝐝𝐚𝐧hitu 𝐛𝐚 𝐄𝐬𝐤𝐨𝐥𝐚 𝐒𝐞𝐤𝐮𝐧𝐝𝐚́𝐫𝐢𝐮 ESTV “Halibur” Betano

S.E, Sekretáriu Estadu ba Komunikasaun Sosiál, Sr. Merício Juvinal dos Reis “AKARA”, hamutuk ho Prezidente Konsellu Imprensa, Sr. Virgilio Guterres no Deputadu Parlamentu Nasionál, Sr. Patrocínio Fernades dos Reis, sai orador ba iha Kampaña Nasionál Kombate HOAX no Promove Internet Saúdavel liu husi “Sensibilizasaun Literasia Dijitál” ba Eskola Sekundáriu Jerál Sekundáriu Téknika Vokasionál “Halibur”, sexta-feira, loron 07 fulan-Outubru, tinan-2022, iha ESTV “Halibur” Betano, Postu Administrativu-Same, Suku-Betano, Munisípiu-Manufahi.

Merício Juvinal dos Reis “AKARA”, hateten, Governu liu husi SEKOMS kontinua hala’o kampaña literasia dijitál ba estudante sira, hodi konsiénsia utiliza plataforma dijitál no enkoraja estudante sira atu uza internet ho pozitivu no saúdavel hodi promove edukasaun sivika ba sidadaun hodi sai matenek iha konsiénsia uza plataforma dijitál.

“AKARA”, hateten, atu kombate HOAX iha rai ida ne’e, iha tempu hanesan promove internet saúdavel, internet ne’ebé pozitivu, hodi asesu informasaun ho matenek iha siénsia téknolojia husi rai seluk seluk.

Ezekutivu, ne’e informa katak, iha era agora tenke uza plataforma dijitál hodi simu informasaun loos iha siénsia tékonolojia, maibé tenke prepara an hodi labele share informasaun ne’ebé lalos. Maibé prepara mós sidadaun sira atu oinsá maka bele matenek hodi utiliza didi’ak plataforma sira hanesan : Facebook, Whatsaap, Instagram, Tiktok, Youtube nsst.

Governu akompaña erá dijítal ne’ebé eziste iha mundu inklui Timor-Leste ho parte pozitivu barak liu, tan ne’e Governu sei la taka plataforma sira ligadu ho dijítal. Maibé prepara nia sidadaun atu oinsá maka bele matenek hodi utiliza didi’ak plataforma sira hotu. Hanesan halo ema bele asesu informasaun ho lais, ajuda prosesu dezenvolvimentu nasaun nia no halo ema sai sivilizadu, dehan “AKARA”.

“AKARA” esklarese katak, desinformasaun ka HOAX hanesan buat ne’ebé mak atu deskredita ema halo paniku, fiar ba informasaun lalos, halo asaun negativu, hodi estraga imajem ema, instituisaun no Governu sira.

SEKOMS husu ba estudante sekundária ESTV “Halibur” Betano, atu kontribui hodi kombate HOAX no promove internet saúdavel, nomós lee livru asesu iha plataforma dijitál sira halo barak, hodi sai ema ne’ebé iha koñesimentu no hanoin kritiku no efetivu.

Iha fatin hanesan, Deputadu Parlamentu Nasionál, Patrocínio Fernandes, salienta katak, hanesan deputadu papel importante mak sei kolabora ho Governu sira hodi regulariza ho lei ruma nune’e sidadaun sira bele uza internet ho sivilizadu, dezenvolvidu nomós sosiedade ida ho kultura rasik.

Entertantu Prezidente Konsellu Imprensa, Virgillio Guterres, hato’o katak, moris iha erá dijitál ne’e dependente ba informasaun, kuandu informasaun laiha, sei atrazadu sei la hetan informasaun hanaran Jerasaun Alfa ka Dijitál Natif

Iha fatin hanesan, Prezidente Autóriedade Munisípiu-Manufahi, Arante Isac Samento, agradese no apresia tebes ba VIII Governu liu hosi SEKOMS ne’ebé mak mai Sensibiliza informasaun hanesan ne’e iha eskola ida ne’e.

“No dala barak ita nia sosiedade obriga aan, adapta ho situasaun iha agora ita iha, dala ruma haluha tiha ita ninia dever ne’ebé mak ita bele, Ho ida ne’e ha’u hanoin katak, buat ne’ebé mak ema barak sempre uza ida ne’e, hodi halo fali sai informasaun ida ne’ebé mak baibain ita bolu “HOAX” informasaun ida ne’ebé mak la ko’alia ajuda ita atu bele dezenvolve ita ninia aan ne’e ho di’ak, Maibé ho kampaña sensibilizasaun literasia dijitál ida ne’ebé bele enkoraja ita hotu, atu koa’lia informasaun loos kredivel ba públiku. dehan “Arante”.

Entertantu Diretór Eskola Sekundária ESTV “Halibur”, hato’o agradese ba SEKOMS, bele partilla informasaun kona-ba kombate HOAX no promove Internet Saúdavel liu hosi Sensibilizasaun Literasia Dijitál, tanba programa ne’e importante tebes ba estudante sira hodi uza plataforma dijitál ho matenek.

Kampaña Sensibilizasaun ne’e marka prezensa husi Deputadu Patrocino Fernandes no Autoridade Munisípiu, Polísia Eskuadra, estudante sekundária tekniku Vokasionál no Profesores sira, estudante ne’ebé partisipa iha eventu Kampaña ne’e hamutuk 125.