DILI (MÍDIA SECOMS) — Ekipa redasaun Mídia Demokrasia hala’o audénsia ofisiál ho Sekretaria Estadu Komunikasaun Sosiál (SECOMS), ne’ebé lidera husi Exelénsia Sr. Expedito Loro Dias Ximenes, iha gabinete SECOMS, sesta-feira (23012026).
Enkontru ne’e ho objetivu atu introdús ekipa redasaun Mídia Demokrasia ba governu no harii relasaun institusionál nu’udar mídia ne’ebé profisionál no responsavel.
Durante audiénsia, ekipa Demokrasia Mídia nian aprezenta perfil instituisaun, ne’ebé harii iha loron 17 fulan-Jullu tinan 2023. Ekipa redasaun esplika kona-ba estrutura pesoál, identidade jornalista sira ne’ebé hala’o serbisu jurnalizmu nian, no diresaun polítika editoriál hosi mídia.
Media Democracia iha estatutu legal ofisial liu husi SERVE.IP, rejistu ona iha Conselho de Imprensa Timor-Leste, no mantein website hanesan media online.
Media Democracia subliña nia foku ba asuntu feto no labarik sira nian, no mós ba asuntu ema ho defisiénsia sira. Maioria jornalista sira ne’ebé envolve mak estudante komunikasaun sosiál, ne’ebé hetan orientasaun atu dezenvolve prátika jornalístika bazeia ba étika, faktu, no interese públiku.
Hatán ba aprezentasaun ne’e, Sekretáriu Estadu Komunikasaun Sosiál (SECOMS) Exelénsia Sr. Expedito Loro Dias Ximenes hato’o apresiasaun ba Media Demokrasi nia inisiativa hodi dezenvolve meiu komunikasaun sosiál ne’ebé orienta ba valór demokrátiku no responsabilidade sosiál.
SECOMS, hato’o ninia komprimisu hodi simu Media Demokrasi nu’udar parseiru iha divulgasaun informasaun públiku.
SECOMS subliña katak, prinsípiu fundamentál jornalizmu nian maka imparsialidade no neutralidade, nune’e mós obrigasaun atu respeita nafatin kódigu étika jornalizmu nian. Mídia sira mós hetan urjente atu hasa’e sira nia profisionalizmu hodi hetan karteira ofisiál ida hosi Konsellu Imprensa, instituisaun ne’ebé regula no monitoriza produtu jornalístiku sira.
“SECOMS husu Media Democracia atu jornalista sira hetan karteira professional hosi Konsellu Imprensa, tanba Konsellu Imprensa nu’udar órgaun regulador, no monitoriza ba produtu jurnalistika”. haktuir SECOMS.
Iha kontestu dezenvolvimentu teknolójiku avansadu, SECOMS destaka dezafiu sira hosi intelijénsia artifisiál, ne’ebé ezije jornalista sira atu hametin sira nia abilidade literasia, hakerek, diskute, no debate ho étika. Diskursu públiku tenke hala’o sein viola privasidade no dignidade individuál.
“Ho prezensa Artificial Intelijensia, maka mídai tenke forte hanesan lee barak, hakerek barak, diskute, no debate barak). Diskute barak maibé tenke ho etika, labele ataka ema nia privasidade”.
Aleinde ne’e, SECOMS subliña importánsia hosi relatóriu bazeia ba faktu ho prosesu verifikasaun ida ne’ebé rigorozu, inklui verifikasaun (check) no re-verifikasaun (re-check) filafali molok publikasaun. Jornalista profisionál sira mós hetan hanoin atu distinge prátika jornalístika hosi atividade iha mídia sosiál, tanba hakerek notísia labele hanesan ho konteúdu iha plataforma Facebook.
“SECOMS husu notisia fo sai bazeia ba faktus, check no re-check”.
Audiénsia ne’e hein atu sai nu’udar pasu dahuluk hodi hametin relasaun entre Mídia Demokrasia ho governu, nune’e mós enkoraja jornalístika profisionál, kredivel ne’ebé kontribui ba dezenvolvimentu demokrasia iha Timor Leste.
Comment