DILI (MÍDAI SEKOMS )—Sekretáriu Estadu Komunikasaun Sosiál (SEKOMS), Expedito Loro Dias Ximenes, husu ba média nasionál sira iha Timor-Leste atu halo deseminasaun informasaun kona-ba valór Loron Nasionál Oseanu ne’ebé sei monu iha loron 5 fulan-Juñu ne’e.
Governante ne’e hato’o liafuan sira-ne’e, iha ámbitu konferénsia de imprensa iha Sentru Konvensaun Dili (CCD), Kaikoli, ne’ebé organiza hosi ekipa Gabinete Vise-Primeiru-Ministru, Ministru Koordenadór Asuntu Ekonomiku no Ministru Turizmu no Ambiente.
Expedito Loro Dias Ximenes hateten, orgaun komunikasaun sosiál sira mós iha papél importante atu fahe informasaun kona-ba importánsia hosi valór akresentadu ne’ebé mai hosi tasi no ekonomia azul.
“Ha’u-nia tasi, Ha’u-nia Timor. Ne’e signifika katak ita presiza proteje ita-nia riku-soin iha tasi laran ba ita-nia moris no ba nasaun nian, liuliu iha vida ekonómika. Tan ne’e, IX Governu Konstitusionál mós tau prioridade ba ekonomia azul. Ko’alia kona-ba ekonomia azul, ita ko’alia kona-ba ekonomia ne’ebé reziliente no sustentável. Importante tebes mai ita atu hateke didiak ba ita-nia tasi,” dehan Sekretáriu Estadu ne’e.
Nia mós agradese Vise-Primeiru-Ministru no entidade tomak ne’ebé providensia ona dadus no matéria importante sira-ne’e, atu nune’e liuhosi meius komunikasaun sosiál bele fahe ba públiku, liuliu ba joven sira, hodi nune’e sira bele haree katak tasi ne’e iha importánsia boot ba moris loroloron nian.
Iha fatin hanesan, Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuady Lay, lori IX Governu nia naran reafirma kompromisu atu implementa polítika no planu asaun hodi promove ekonomia tasi ne’ebé reziliente no sustentável iha Timor-Leste.
“Ne’e mós sai hanesan prioridade ba protesaun ambiente, kombate poluasaun iha tasi, no jestaun sustentável ba rekursu sira iha tasi laran. Governu mós rekoñese esforsu hosi komunidade lokál sira, organizasaun sosiedade sivíl, parseiru dezenvolvimentu, no instituisaun públika sira ne’ebé kontribui ona ba preservasaun tasi Timor-Leste nian,” dehan Vise-Primeiru-Ministru.
Francisco Kalbuady Lay hatutan, atividade sira iha Loron Tasi nian ne’e inklui kampaña sensibilizasaun, atividade imprensa kona-ba tasi ka oseanu, programa edukativu, no inisiativa sira atu promove ekonomia azul ne’ebé sustentável.
Nia mós relembra, ajenda ekonomia azul ne’e lidera diretamente hosi Primeiru-Ministru, Kay Rala Xanana Gusmão.
Entertantu selebrasaun Semana Nasionál Oseanu 2026 sei hala’o entre loron 3 to’ 8 fulan Juñu, ho inisiativa sira iha Dili, Ataúro, Lautém, no munisípiu sira seluk ihaTimor-Leste atu envolve atividade sira ne’ebé foka ba konxiénsia ambientál, edukasaun, kultura, turizmu, ekonomia azul, no konservasaun tasi nian.
Ekipa Mídia SECOMS
Comment