DILI (Media SEKOMS) — Reprezenta IX Governu Konstitusionál, Sekretáriu Estadu Komunikasaun Sosiál (SECOMS), Expedito Loro Dias Ximenes, hamutuk ho CEO Eto-Telkom, Nilton Gusmão, iha konferénsia imprensa ne’ebé realiza iha Hotel Timor, husu ba povu Timor-Leste tomak atu asiste jogu futeból Kopa Mundiál ne’ebé sei akontese iha semana oin, liuliu iha loron 11 Júnio 2026 (tuir kalendáriu mundiál).
Iha konferénsia imprensa ne’e, Sekretáriu Estadu Expedito Loro Dias Ximenes reprezenta IX Governu hodi husu ba povu Timor-Leste, liuliu ba joven sira ne’ebé hadomi futeból, atu asiste eventu boot ida-ne’e ho domin no hadomi malu hanesan Timoroan.
“Ita hotu hatene katak Eto-Telkom maka sai host broadcasting (emisor prinsipál) ba Kopa Mundiál ka Tasa Mundiál. Tanba eventu desportu futeból ne’e bele dehan katak atividade desportiva komunitária ba povu no komunidade tomak, liuliu joven sira ne’ebé hadomi tebes futeból,” dehan Sekretáriu Estadu.
Iha Timor-Leste, iha fulan ida nia laran, komunidade sira sei asiste transmisaun Kopa Mundiál liuhusi Eto-Telkom nia kanál no RTTL, E.P liuhusi antena liur (terrestrial), no Eto-Telkom halo tiha ona akordu servisu hamutuk, no ohin governu ho empreza buka atu esplika di’ak liu tan ba komunidade tomak.
“Dala ida tan, IX Governu hakarak konvida ita hotu, konvida joven sira, atu asiste eventu boot ida-ne’e ho domin no hadomi malu, hamutuk hodi akompãna eventu internasionál futeból ida-ne’e,” Expedito Loro Dias Ximenes husu.
Governante ne’e mós agradese ba empreza Eto-Telkom ba servisu hamutuk durante iha prosesu lubuk ida, nune’e ho rezultadu servisu ne’e, povu tomak bele akompaña ho di’ak liuhusi kanál RTTL no mós streaming husi Eto nia plataforma. Liuhusi biban ida-ne’e, nia lori IX Governu nia naran, hakarak konvida komunidade tomak, liuliu joven sira ne’ebé hadomi futeból, atu bele akompaña hodi asiste iha uma ka iha fatin públiku sira, no iha fatin rurál sira ne’ebé uza antena li’ur hodi bele akompaña iha fatin hotu-hotu.
Iha fatin hanesan, CEO empreza Eto-Telkom no mós lori kargu nu’udar Prezidente Federasaun Futeból Timor-Leste (FFTL), Nilton Gusmão, rekoñese katak maski dezenvolvimentu futeból nian iha Timor-Leste sei la’o neneik, maibé ida-ne’e sei la hamenus ita-nia paixaun ba atividade desportiva ida-ne’e.
“Lori Federasaun Futeból Timor-Leste (FFTL) nia naran, nu’udar Prezidente, ha’u hakarak hato’o agradesimentu boot ba Sekretaria Estadu Komunikasaun Sosiál (SECOMS) no, liuliu, ba IX Governu Konstitusionál nia laran-luak hodi apoia atividade ida-ne’e. Ita konsidera futeból nu’udar eventu espetakulár no boot liu iha mundu, ne’ebé agora sei fó sai mós Kopa Mundiál 2026 nian iha ita-nia rai Timor-Leste. Eventu desportivu boot liu iha mundu ida-ne’e, ita konsidera nu’udar espetákulu ida ne’ebé mundu tomak tau matan kada tinan haat, hodi hakerek istória foun no asiste mós kampiaun foun ba Kopa Mundiál. Timor-Leste mós hetan priviléjiu ida-ne’e hodi asiste eventu espetakulár ne’e liuhusi kanál nakloke husi ita-nia empreza públika, Radia Televizaun Timor-Leste, Empreza Públika (RTTL, E.P.), atu ita-nia sosiedade no komunidade hotu bele asiste gratuitu.”
Nilton Gusmão mós hato’o lia-menon ba adeptu sira:
“Mai ita tuur hamutuk hodi asiste, no fó apoiu ba kada nasaun ka ekipa ida ne’ebé ita-boot sira hakarak apoia ka hadomi. Maibé, manan ka lakon ne’ebé mai husi rezultadu labele haketak ita iha Timor-Leste; pelu kontráriu, atividade ida-ne’e husu de’it mai ita hotu atu asiste hodi haksolok, no hodi hametin liután ita-nia unidade nasionál.” Nilton Gusmão hato’o lia-menon.
Prezidente FFTL ne’e mós enkoraja katak futeból nu’udar atividade ida ne’ebé dada ema barak nia atensaun, no Timoroan sira iha paixaun ne’ebé boot tebes ba futeból. Iha Timor-Leste, maski dezenvolvimentu futeból nian sei la’o neneik, maibé ida-ne’e sei la hamenus ita-nia paixaun ba atividade desportiva ida-ne’e. Tanba ne’e, lori Federasaun Futeból Timor-Leste nia naran, nia hakarak konvida Timoroan hotu atu asiste espetákulu mundiál ida-ne’e eventu desportivu ne’ebé boot liu iha mundu ho espíritu desportivu.
Fontes: Mídia SECOMS
Comment