DILI (MÍDIA SECOMS) – Sekretáriu Estadu Komunikasaun Sosiál (SEKOMS), Expedito Loro Dias Ximenes, subliña pilar xave tolu funsaun públika nian bainhira hala’o kna’ar nu’udar inspetor ba serimónia isar bandeira iha Palásiu Governu, Segunda (1 Juñu). Pilár tolu ne’e inklui dixiplina serbisu nian, produtividade no kualidade serbisu nian, no utilizasaun responsável ba teknolojia foun sira, inklui intelijénsia artifisiál (IA).
Serimónia mensál, ne’ebé halo rotasaun entre ministériu sira ne’ebé iha ámbitu hosi Ministériu Prezidénsia Konsellu Ministru (MPKM), partisipa mós hosi Primeiru-Ministru Kay Rala Xanana Gusmão, diretór-jerál sira, xefe gabinete sira, no funsionáriu sira hosi instituisaun autónomu sira.
Iha ninia diskursu, Expedito subliña katak Funsionáriu Públiku sira tenke kaer metin oras serbisu tuir kontratu no oráriu loron-loron nian.
“Disiplina iha serbisu: Ita tama serbisu ho oras ne’ebé determina ona iha ita-nia kontratu ka serbisu loron-loron nian. Produtividade: Ita-nia servisu ne’ebé halo loron-loron tenke hatudu rezultadu, katak labele tama tuku ualu, sai deskansa tuku sanulu-resin-rua, tama fali tuku rua, maibé ita-nia produtividade ka rezultadu laiha”. dehan Expedito.
SEKOMS mós enkoraja funsionáriu públiku sira atu utiliza fasilidade teknolójika ne’ebé governu fornese, inklui asesu internet iha eskritóriu, hodi hasa’e kualidade no efisiénsia serbisu. Nia hatete katak avansu teknolójiku sira tenke iha balansu ho aprendizajen kontínuu iha sira nia ambiente serbisu ida-idak.
“Tanba ne’e, ita presiza aprende liután iha ita-nia serbisu-fatin idak-idak no uza teknolójia ho responsabilidade: Iha avansu teknolojia oras ne’e daudaun, Governu tau fasilidade oin-oin iha ita-nia serbisu-fatin inklui internet. Fasilidade sira-ne’e ita atu uza hodi haraik forsa ba ita-nia produtividade serbisu ho kualidade,” dehan Expedito Loro Dias Ximenes.
Liután, Expedito fó hanoin ba funsionáriu públiku sira atu uza mídia sosiál ho matenek no saudavel. Nia haktuir katak funsionáriu públiku, nu’udar servidór estadu, iha obrigasaun morál atu jere konfiansa públiku no orsamentu sira ho responsabilidade.
Hanesan servidór no ajente ba Estadu no povu, atu fó atendimentu ne’ebé di’ak, hodi hatudu serbisu ho kbi’it no domin. Povu fiar ita atu jere sira-nia osan, nune’e ita tenke buka oinsá uza povu nia osan ho didi’ak.
Expedito hein katak momentum Juñu 2026 sei hametin funsionáriu públiku sira-nia kompromisu atu serbisu ho dixiplina no responsabilidade ba atendimentu públiku ne’ebé di’ak liután.
Comment