ERMERA, (MÍDIA SECOMS) — Sekretaria Estadu ba Komunikasaun Sosiál (SEKOMS) liuhusi Diretór Nasionál Dezenvolvimentu Mídia Lokál (DNDM), Adriano Monteiro, lansa ona plataforma ‘Suku Dijitál’ iha Suku Poetete-Lodudu, Munisípiu Ermera, Sesta-feira ne’e. Programa ne’e nu’udar prioridade IX Governu Konstitusionál nian hodi fasilita komunidade sira asesu informasaun no promove potensialidade lokál.
Diretór DNDM, Adriano Monteiro, ne’ebé reprezenta Sekretáriu Estadu Komunikasaun Sosial , Expedito Loro Dias Ximenes, hateten katak programa ne’e importante tebes atu nune’e mundu bele koñese saida mak akontese iha suku laran.
“Ho ezisténsia suku dijitál, bele fasilita ita-nia komunidade sira ba asesu informasaun kona-ba saida de’it maka akontese iha ita-nia suku laran, liuliu oinsá atu promove potensialidade sira kona-ba agrikultura, edukasaun, sosiál no kultura ne’ebé maka iha Suku Poetete-Lodudu,” dehan Adriano Monteiro.
Atu programa ne’e la’o ho susesu, SEKOMS serbisu hamutuk ho parseiru telekomunikasaun Telkomcel no organizasaun ChildFund hodi fó kapasitasaun kona-ba oinsá atu jere no fahe informasaun liuhusi plataforma dijitál ne’e.
Iha fatin hanesan, Administradór Postu Administrativu Ermera, Alarico de Jesus Soares, fó sai nia agradesimentu no ksolok tanba Suku Poetete-Lodudu mak sai hanesan suku dahuluk iha Munisípiu Ermera ne’ebé asesu ba teknolojia ne’e.
“Ita agradese tanba ita-nia suku foun maibé nia avansadu fali ho suku seluk. Ita agradese tanba SEKOMS bele mai establese Website iha ne’e atu nune’e lori ita-nia informasaun sira liuliu iha munisípiu hodi to’o ba nasionál,” tenik Alarico.
Alarico fiar katak inisiativa foun ne’e bele sai ezemplu di’ak ba suku sira seluk iha Ermera hodi labele hela hodi tuir dezenvolvimentu teknolojia nian.
Serimónia lansamentu ne’e hetan mós partisipasaun husi Administradór Postu Administrativu Ermera, Xefe Suku Poetete ho estrutura suku nian, inklui komunidade lokál sira.
Comment