GLENO (MÍDIA SECOMS) — Sekretaria Estadu Komunikasaun Sosiál (SEKOMS) kontinua nia kolaborasaun estratéjiku ho ChildFund hodi hala’o formasaun loron rua kona-ba implementasaun Swipe Safe no jornalizmu báziku ba edukador sira. Formasaun ne’e hala’o iha auditóriu Eskola Sekundária Estadu Nino Konis Santana, Ermera, iha Segunda, 8 Juñu 2026.
Xefe Departamentu Estudu Mídia, Promosaun, no Dezenvolvimentu (DEPD) SEKOMS, Alberto Ribeiro, haktuir katak objetivu prinsipál hosi formasaun ne’e atu hasa’e profesór sira-nia koñesimentu kona-ba oinsá hakerek no upload informasaun ka atividade eskola nian ho forma dijitál.
Treinamentu ne’e inklui mós matéria kona-ba Swipe Safe, ka protesaun ba labarik iha plataforma dijitál, ne’ebé sei implementa liuhosi website Jornal Parede Dijitál eskola nian.
“Treinamentu kona-ba jornal parede dijitál ne’ebé realiza dadaun ne’e, nu’udar kooperasaun ida entre SEKOMS ho ChildFund hodi fahe koñesimentu ba manorin-na’in sira kona-ba utilizasaun aplikasaun Swipe Safe ka seguransa liña-leten (online) ba labarik sira,” dehan Alberto.
Xefe Departamentu ne’e mós subliña katak karik eskola sira seluk iha interese atu kria jornál parede dijitál bele hato’o pedidu ofisiál ba Gabinete Sekretáriu Estadu Komunikasaun Sosiál. Ekipa tékniku sei ajuda dezeña website ida ba eskola sira.
Entretantu, Reprezentante ChildFund Napoleão Rodrigues Vieira, iha nia aprezentasaun subliña katak iha era kontemporánea, internet hetan dezenvolvimentu lalais maibé akompaña mós ho risku ne’ebé signifikativu. Tanba ne’e, ChildFund kolabora ho SEKOMS hodi promove seguransa online ba labarik no komunidade liu hosi inisiativa website Jornal Parede Dijitál eskola nian.
“Importánsia hosi Swipe Safe mak oferese koñesimentu seguransa online ba labarik sira hodi koñese risku sira no hatene oinsá asegura sira-nia an. Liuhosi Jornal Parede Dijitál no Suku Dijitál, komunidade no labarik sira bele asesu mós aplikasaun ne’e hodi prátika seguransa online,” tenik Napoleão.
Formasaun ne’e hetan partisipasaun hosi partisipante nain 14, inklui profesór sira, funsionáriu sira hosi Radio Komunidade Kopi, no funsionáriu sira hosi Distritu Dijitál Poetete-Lodudu. Eventu ne’e hala’o durante loron rua, hosi Segunda to’o Tersa, 8-9 Juñu 2026.
Comment