DILI (MÍDIA SECOMS) — Jornalista ruanulu resin lima hosi mídia konvensionál no plataforma dijitál Timor-Leste nian sei partisipa iha programa formasaun profisionál durante fulan ida iha Repúblika Populár Xina.
Inisiativa ne’e organiza hosi Institute of International Studies and Advanced Training (IISAT) iha kolaborasaun ho The China International Communications Group (CICG), fasilita liuhosi kolaborasaun ida entre Embaixada Xina iha Timor-Leste no Governu Timor-Leste liuhosi Sekretaria Estadu Komunikasaun Sosiál (SEKOMS).
Antes delegasaun ne’e atu sai, Sekretáriu Estadu Komunikasaun Sosiál Expedito Loro Dias Ximenes hato’o nia agradesimentu ba Governu Xina nia apoiu hodi dezenvolve kapasidade jornalista Timor-Leste nian, partikularmente iha jornalizmu investigativu no área sira seluk relevante.
Governante ne’e husu ba jornalista sira ne’ebé selesionadu atu aproveita didi’ak oportunidade ne’e bainhira fila mai Timor-Leste, fahe esperiénsia sira ho kolega sira ne’ebé seidauk hetan oportunidade ne’e.
Programa formasaun ne’e ho objetivu atu hasa’e abilidade iha área oioin jornalizmu modernu nian, iha paizajen mídia Timor-Leste nian ne’ebé evolui, hasoru transformasaun dijitál no ezijénsia ne’ebé buras ba kobertura ho kualidade.
Jornalista na’in 25 ne’e tuir planu sei sai hosi Dili iha loron-tersa, 14 fulan-jullu tinan 2026.
Comment