DILI (MÍDIA SECOMS) — Iha dezenvolvimentu lalais teknolojia globál ho evolusaun makaas, asesu ba informasaun mak xave ba progresu iha kada nasaun ida. Ho mudansa ne’e evidente iha Postu Administrativu Nain Feto, Munisípiu Dili, suku ofisialmente tama ona iha faze foun hanesan suku Dijitál.
Pasu istóriku ne’e marka ho lansamentu ofisiál hosi Governu, liuhosi Sekretáriu Estadu Komunikasaun Sosiál (SEKOMS), Expedito Loro Dias Ximenes, hamutuk ho governu lokál. Inisiativa Suku Dijitál ne’e dezeña atu fornese asesu ba internet, fasilita komunidade no governu lokál iha asesu ba informasaun ho nakloke. Aleinde ne’e, sentru dijitál ne’e sai plataforma edukasionál ida ba foin-sa’e no estudante sira atu aprende kona-ba teknolojia, multimédia, no hadi’a literasia dijitál.
Xefe Suku Bemori, Francisco Sequeira, agradese IX Governu Konstitusionál no SEKOMS. Maibé, ba sustentabilidade programa ne’e, suku hein katak SEKOMS sei kontinua fó formasaun regulár ba tékniku suku sira nune’e plataforma dijitál bele funsiona ho ótimu no independente.
Sekretáriu Estadu, Expedito Loro Dias Ximenes, subliña, programa Suku Dijitál ne’e hatudu kompromisu governu nian atu lori atendimentu públiku no teknolojia internet to’o iha baze.
Nia fó hanoin ba públiku atu prontu adopta teknolojia globál hodi asesu informasaun ho lalais no seguru. Maibé, nia mós alerta katak avansu teknolójiku, hanesan Intelijénsia Artifisiál (IA), lori risku sira bainhira uza lahó kuidadu no sentidu responsabilidade nian.
Suku Dijitál Bemori agora hamriik hanesan odamatan foun ida. Ne’e mak pasu konkretu ida hodi taka lakuna teknolójiku, prepara komunidade rurál atu kompete iha era dijitál ho matenek no responsabilidade.
Ekipa Mídai SECOMS
Comment