LIUZHOU, XINA (MÍDIA SECOMS) — Delegasaun jornalista Timor-Leste nian hala’o vizita ofisiál ida ba Eavision Robotics Technology iha Liuzhou, Xina. Vizita ne’e ho objetivu atu hetan esperiénsia direta kona-ba teknolójia drone avansadu no nia papel boot iha agrikultura moderna.
Eavision, nu’udar kompañia lider ida iha robótika agrikultura intelijente ne’ebé estabelese iha tinan 2016, espesializa iha dezenvolvimentu drone autónomu nian ne’ebé uza intelijénsia artifisiál (Artificial Intelligence – AI) no sistema persepsaun vizuál hodi suporta setores agrikola.
Dezenvolvimentu Indústria Drone iha Liuzhou dezenvolve-an lalais ho suporta hosi manufaktura avansada no inovasaun iha agrikultura intelijente. Eavision Robotics mak sai nu’udar autor prinsipál ida hosi Xina ne’ebé foka ba drone agrikultura ho teknolojia AI no sistema vizuál.
Entre tinan 2015 to’o 2016, kompañia ne’e foka ba dezenvolvimentu drone autónomu ba agrikultura presizaun nian, ne’ebé inklui irigasaun, mapeamentu, no monitorizasaun rai. Drone sira-ne’e uza AI, vizaun binokular no sistema Lidar hodi opera ho efisiénsia iha área k-onkordáns ka komplikadu hanesan foho, to’os ai-horis, no rai ne’ebé la regular.
Indústria drone Eavision iha Liuzhou reprezenta konvergénsia entre inovasaun, kapasidade manufaktura, no kooperasaun internasionalsional,liu-liu atu apoia modernizasaun agrikultura iha nasaun sira ne’ebé sei dezenvolve-an.
Diskusaun Interativa no Demostrasaun Teknolójia Durante vizita ne’e, delegasaun Timor-Leste halo diskusaun interativa ho Diretór Kompañia EAVISION, Yang Zhongwen. Nia esplika katak kompañia ne’e foka liután ba inovasaun, ekspanzun merkadu no oportunidade kooperasaun ho nasaun sira iha Sudeste Aziátiku. Kompañia ne’e mós hatudu katak baze manufaktura iha Liuzhou funsiona nu’udar sentru importante ba ezportasaun, liu-liu ba merkadu ASEAN.
Pontu importante ida hosi vizita ne’e mak jornalista timoroan sira asiste direta demostrasaun drone agrikultura ne’ebé bele lori bee to’o litru 80, ne’ebé uza ba rega jardín no to’os. Demostrasaun ne’e hatudu efisiénsia no efikásia hosi solusaun agrikultura ho asisténsia drone, ne’ebé agora dadaun uza barak atu aumenta produsaun no hamenus traballu manuál.
Iha biban hanesan, Diretór Eavision iha Liuzhou, Yang Zhongwen, relata katak sira-nia venda anual hetan reseita entre 25.000 USD to’o 30.000 USD ba fa’an drone, ho parte boot ne’ebé ezporta ba nasaun ASEAN sira. Kada drone iha presu besik USD 7.000, ne’ebé sai nu’udar solusaun kompetitiva ida ba nesesidade agrikultura moderna.
Liuzhou mak sidade indústria boot ida ne’ebé lokaliza iha Rejiaun Autónoma Guangxi Zhuang, iha Xina parte súl. Sidade ne’e konseñidu nu’udar sentru manufaktura importante iha Xina, ho papel boot iha indústria oioin hanesan otomóvel, mákina, no teknolójia avansada, inklui robótika no ekipamentu intelijente.
Comment