DÍLI (MÍDIA SECOMS) — Sekretáriu Estadu Komunikasaun Sosiál (SECOMS) Expedito Loro Dias Ximenes, agradese ba Asosiasaun Defisiénsia Timor-Leste (ADTL) no Klibur Defisiénsia Timor-Leste (KDTL), hamutuk ho intérprete lian jestuál sira tanba kontribui ona hodi promove inkluzaun liuhosi lian jestuál iha mídia nasionál.
Agradesementu ne’e hato’o iha serimónia abertura ba Sélabrasaun Loron Nasionál Defisiénsia nian ne’ebé realiza iha Fatuhada, Díli.
Governante ne’e afirma katak lian jestuál hanesan instrumentu komunikasaun loron-loron ne’ebé fasilita sidadaun hotu atu hetan no asesu ba informasaun.
“Lori IX Governu Konstitusionál nia naran, ha’u hato’o agradesementu ba Senhora Diretora no intérprete lian jestuál sira hotu. Agora kolega sira ne’ebé labele rona no ko’alia bele ona akompaña notísia liuhosi lian jestuál. Tan ne’e, ha’u agradese ba xefe sira tanba bele fasilita ida-ne’e”, dehan SECOMS Expedito Loro Dias Ximenes.
Governu mós rekoñese katak ema ho defisiénsia, liuliu maluk sira ne’ebé ho defisiénsia matan no tilun, hanesan parte ne’ebé vital no importante iha prosesu konstrusaun Estadu no dezenvolvimentu nasionál.
“Ita idak-idak iha ita-nia kapasidade no limitasaun. Dala barak kolega sira ho defisiénsia, maski hasoru rezisténsia, maibé iha hanoin di’ak liu fali. Governu konsidera sira-nia partisipasaun importante tebes iha prosesu konstrusaun Estadu oras ne’e daudaun,” nia subliña.
SECOMS hato’o mós apresiasaun espesiál ba Diretór Ezekutivu ADTL, Cesário da Silva, hamutuk ho estrutura tomak ne’ebé durante tinan barak tulun ona Governu hodi dignifika ema ho defisiénsia. Maski ho limitasaun, sira hatudu matenek no kapasidade hodi kontribui ba dezenvolvimentu nasionál.
Iha ikus, Governante ne’e mós husu ba ADTL no KDTL atu kontinua serbisu hamutuk ho governu hodi kontribui ba prosesu dezenvolvimentu inkluzivu iha Timor-Leste.
Comment