SEKOMS Apresia progresu servisu ne’ebé CLJ hatudu
Sekretáriu Estadu ba Komunikasaun Sosiál apresia ho servisu Konsultóriu Língua Portuguesa (CLJ) tanba atinji progresu barak liuliu iha formasaun lian portugués aplikada ba jornalismu.
Merício Juvinal dos Reis “AKARA” hato’o apresiasaun ne’e wainhira hala’o sorumutu ho ekipa CLJ, kuarta-feira, loron 15, fulan-jullu tinan 2020, iha sala reuniaun SEKOMS, Palásiu Governu, Dili.
Ezekutivu ne’e afirma tuir relatóriu servisu ne’ebé nia parte hetan husi CLJ, jornalista sira ne’ebé tuir formasaun hahu produz notísia iha lian Portugés no timor oan sira ne’ebé servisu hanesan revizor linguístiku iha konsultóriu ne’e mos ho kualidade ne’ebé aas no konsege halo ona revizaun ba notísia ho versaun potugués hamutuk rihun sia iha instituisaun media sira hanesan TATOLI, RTTL-EP, Timor Post, Independente no GMN.
AKARA hatutan formasaun ne’e importante atu fasilita jornalista sira hakerek notísia iha lian portugés ho kualidade diak no planeia sei rekruta tan timor oan balun hodi serbisu hamutuk ho CLJ atu nune’e bele apoia instituisaun média sira iha Timor-Leste hodi halo revizaun ba notísia iha lian Portugés.
Ezekutivu ne’e husu atu kooperasaun ne’e kontinua hala’o no SEKOMS kompromete atu iha tinan 2020 aloka mos orsamentu hodi apoia projetu formasaun língua portuguesa ne’e.
Alen de formasaun língua protuguesa, SEKOMS mos planeia atu kapasita jornalista sira iha lian Tetun nune’e bele hakerek notísia tuir padraun linguístika ne’ebé diak.
Rekorda fila-fali katak akordu kooperasaun entre SEKOMS ho Instituto Camões hala’o ofisialmente iha tinan 2016 no kuaze jornalista no profisional media iha instituisaun estadu sira iha Timor-Leste hamutuk atus rua resin mak sai benefisiariu ba projetu ne’e.
Comment