Governu desida ona fatin ba Grupu Arte Moris
Governu desida ona fatin ba Grupu Arte Moris atu hala’o sira nia atividade.
Deklarasaun ne’e hato’o husi Sekretáriu Estadu Terras no Propriedade, Mario Ximenes, wainhira hamutuk ho Sekretáriu Estadu ba Komunikasuan Sosiál, Merício Juvinal dos Reis “AKARA” hala’o enkontru ho Grupu Arte Moris kuarta-feira, loron 15 fulan-jullu tinan 2020, iha sala reuniaun SEKOMS, Palásiu Governu, Dili hodi atualiza informasaun kona-ba problema ne’ebé grupu ne’e hasoru.
Mario Ximenes hateten, Governu indika fatin rua permanente iha MTCI nia kotuk maibe sei halo koordenasaun ho tékniku no pontu fokal sira atu hadia fatin ne’e antes entrega ba grupu ne’e hodi hala’o atividade.
“Kona-ba asuntu ne’e, iha loron rua liu ba membru governu nain hat halo ona enkontru iha Gabinete Sekretáriu Estadu Arte no Kultura no hetan ona desizaun hodi deside fatin rua iha MTCI nia kotuk no ida ne’e permanente atu entrega duni onabba sira maibe sei koordena ho tékniku no pontu fokal sira atu hadia molok entrega”, hateten Mario Soares.
Ezekutivu ne’e hatutan tuir lei Estadu so bele atribui konsesaun ba organizmu Estadu nian maibe Arte Moris hanesan Organizasaun privada tenki kumpri regulamentu ne’ebé governu kria atu nune’e sira bele hala’o knaar ho diak.
Sekretáriu Estadu ne’e afirma hahu kinta-feira, loron 16 fulan-jullu, grupu ne’e bele ba hasoru Diresaun Jeral Terras no Propriedade atu hatudu fatin tanba desizaun ne’ebé foti husi Ministériu Justisa no Sekretaria Estadu Terras no Propriedade klaru ona.
Antes ne’e, Grupu Arte Moris okupa edifísiu estadu ida iha Comoro, Dili, maibe governu deside hodi hasai grupu refere husi fatin ne’e ho razaun atu harii Sentru Kultural.
Comment