Afirmasaun ne’e hato’o husi Sekretáriu Estadu ba Komunikasaun Sosiál, Merício Juvinal dos Reis “AKARA”, bainhira sai oradór iha programa Dili Dialog Forum ho tema “Governu nia haree ba dezenvolvimentu mídia iha Timor-Leste”.
Ezekutivu ne’e hateten hafoin Timor-Leste restaura independénsia, mídia sira mós hahú transforma an nu’udar meiu komunikasaun públiku no privadu no balun hahú adapta ona era dijitál.
“Governu iha kna’ar atu apoia nafatin mídia estadu sira, hanesan Tatoli, I.P. no RTTL, E.P. hodi sai mídia públiku ida ne’ebé profisionál no serbí ba interese públiku no mídia privadu sira liuhusi fundu transferénsia públika”.
Iha tinan hirak liubá, ha’u aprezenta lei ida atu fó subsídiu ba mídia privadu sira liuhusi fundu transferénsia públika, maibé Prezidente Repúblika Sesante veta tiha, maibé hein katak ho Prezidente foun, ita bele hahú diskute fali, dehan “AKARA”.
Governante ne’e afirma asaun balun maka halo ona, hanesan diversifikasaun meiu komunikasaun iha rai-laran husi konvensionál ba plataforma dijitál hanesan live streaming, rádiu streaming no mídia online, la’ós de’it iha nível nasionál, maibé ba mós nível munisipál.
AKARA realsa Governu kontinua fó apoiu ba asosiasaun jornalista sira hodi kapasita jornalista sira rádiu komunidade sira bazeia ba proposta ne’ebé aprezenta.
Relasiona ho Lei Rádiudifuzaun, SEKOMS informa kriasaun Lei ne’e atu asegura direitu no knaar jornalista sira-nian no oras ne’e dadaun sei iha hela prosesu diskusaun iha Parlamentu Nasionál.
Merício Juvinal dos Reis “AKARA” elojia inisiativa Konsellu Imprensa hodi organiza programa Dili Dialog Forum no lansa mós Relatóriu Tinan Fiskál 2022.
Aleinde Sekretáriu Estadu ba Komunikasaun Sosiál, oradór sira ba programa ne’e mak hanesan Sekretária Estadu Igualdade no Inkluzaun no Adjuntu Komisáriu CAC.
Programa ne’e partisipa mós husi nain ba mídia sira. estudante universitáriu, jornalista no entidade relevante sira seluk.
Comment