MAPKOMS INTERINU PARTISIPA IHA REUNIAUN PLENÁRIA ORDINÁRIA IHA PARLAMENTU NASIONÁL

Iha intervensaun diversas, Deputadu sira hato’o preokupasaun oioin liga ho problema edukasaun, saúde, infraestrutura, ekonomia liuliu folin nesesidade bázika ne’ebé aumenta iha merkadu inklui problema subsídiu ba pesoál liña balun ne’ebé to’o ohin loron seidauk hetan pagamento no estatutu traballadór RTTL-EP ne’ebé to’o ohin loron seidauk sai permanente.

Iha intervensaun ne’e mós, Deputadu sira kestiona kona-ba fó ka lae konvite ba líder nasionál sira tanba iha serimónia komemorasaun restaurasaun independénsia 20 de Maio ne’e sira la haree partisipasaun husi líder nasionál balun hanesan Kay Rala Xanana Gusmão.

Alende ne’e, kestiona mós kona-ba funsionáriu no pesoál seguransa iha munisípiu sira ne’ebé estabelese Programa Naroman ba Suku, ne’ebé to’o ohin loron seidauk hetan pagamentu.

Hatan kona-ba konvite ba líder nasionál sira, Ministru Interinu Asuntu Parlamentár no Komunikasaun Sosiál, Merício Juvinal dos Reis “AKARA” hatete nia parte konfirma ho Vise-Ministru Estatál no komisaun organizadora katak líder nasionál hotu-hotu hetan konvite hodi partisipa iha loron nasionál ne’e.

Relativamente ho pagamentu ba pesoál frontline liuliu traballadór RTTL.EP ne’ebé balun simu osan uituan kompara ho pessoal média sira seluk, “AKARA” hatete Governu halo pagamentu bazeia ba dekretu Lei númeru 1/2022 iha ne’ebé Governu liu husi Minsitériu Finansas selu ona profisionál ba periódu fulan neen nian no tuir dekretu ne’e rasik, pagamentu só bele halo de’it ba profisionál sira ne’ebé halo atividade jornalistika.

Enquantu Liga ba funsionáriu RTTL.EP ne’ebé seidauk sai funsionáriu permanente, Ministru MAPKOMS interinu afirma RTTL hanesan empreza pública no Governu sei tau atensaun ba kestaun ne’e.

Kona-ba Programa Naroman ba Suku, Governante ne’e hatete, Objetivu husi Naroman ba Suku atu fahe no lori informasaun ba suku sira liuliu hiak ne’ebé la hetan asesu ba informasaun no laos estabelese atu fó saláriu ba suku sira.

Preokupasaun sira seluk ne’ebé seidauk fó resposta, MAPKOMS sei enkamiña ba ministériu kompetente atu buka solusaun.