DILI (MÍDIA SECOMS) — Parlamentu Nasionál, liu husi Sesaun Plenáriu Extraordináriu, iha loron 28 fulan maiu tinan 2026, Deputadu sira hala’o diskusaun no votasaun iha jeneralidade ba Proposta Lei nú 31/VI (3ª) – alterasaun dahuluk ba Lei nu 8/2025, loron 27 fulan novembru, Orsamentu Jeral Estadu ba Tinan 2026, ho votus a favor 42, kontra 0 no abstensaun 23. Diskusaun ne’e konta ho prezensa husi Primeiru-Ministru, Kay Rala Xanana Gusmão ho membru Governu sira hotu.
Orsamentu retifikativu ne’ebé Governu aprezenta ho montante millaun $ 192, hodi assegura situasaun iha rai laran relasiona ho impaktu husi funu mediu oriente nian, ho nune’e Governu prevê medida hitu ne’ebé mak sai prioridade hodi garantia seguransa enerjétika no segurança alimentar iha país, medidas hirak ne’e maka hanesan: Sosa kombustivel ba rezerva nasionál, Subsídiu kombustivel, Seguransa alimentar, Segurança nasional ba rekrutamentu 400 kadetes PNTL, Despeza prezidénsia CPLP, Reforsu kapasidade administrativa no operasionál rejiaun administrativa (RAEOA), no Reforsu rezerva kontijensia.
Diskusaun no votasaun iha jeneralidade ho durasaun loron ida, ne’ebé nia prosesu diskusaun hahu ho aprezentasaun husi Primeiru-Ministru, Kay Rala Xanana Gusmão hafoin kontinua ho aprezentasaun relatóriu no apreser husi Komisaun Finansas Públika (Komisaun C Parlamentu Nasionál), ne’ebé reprezenta husi Prezidente Komisaun Deputada Cedelizia Faria dos Santos, no relatora Deputada Aliança da Conceição Araújo, kontinua ho diskusaun no resposta husi Governu, no ikus liu intervensaun husi bankada parlamentar sira no Governu, hafoin hakotu ho aprovasaun iha jeneralidade.
Diskusaun especialidade sei hala’o iha loron tuir mai 29 fulan maiu to’o 2 fulan juñu tinan 2026, ho orden diskusaun no votasaun kada artigu husi proposta lei refere.
Sesaun Plenária ne’e prezidi husi Prezidente Parlamentu Nasionál, Maria Fernanda Lay, no akompaña husi membru Meza sira.
Fontes: Media Parlamento Nacional
Comment