Presidente Republica Democratica Timor Leste José Ramos-Horta hateten Timor-Leste nia naran bo’ot no koinesidu iha mundo nia matan, no numero 1 iha ASEAN tamba Liberdade Imprensa.
PR hato’o lia hirak nee wainhira participa selebrasaun aniversáriu Média Hatutan.com ba dala 1, Kuarta-Feira,12 Outubru iha salaun enkontru Suai-Room, Timor-Plaza.
Ramos-Horta mos salienta tan katak Governu iha obrigasaun tau orsamentu apoiu média sira iha Timor Leste.
“Timor Leste nian naran morin no boot iha mundu nia matan tamba liberdade imprensa , tanba ne’e, husu Governu tenke tau orsamentu hodi apoiu media iha Timor Leste”.
PR, mos promete sei promulga lei media nian nebe’e apoiu media karik too iha nia mesa.
“Kondisaun ekonómia sosiál ita nian, se ita haree media hanesan ita nia instrumentu edukasaun, informasaun servisu públiku, entaun ita buka apoiu, mesmu kualidade laiha”. dehan Prezidente Repúblika.
Iha Fatin hanesan, Sekretáriu Estadu Komunikasaun Sosiál, Merício Juvinal dos Reis “Akara’, hato’o katak, Governu sempre hanoin di’ak no kontinua dezenvolve média sai parseiru di’ak, ba dezenvolvimentu nasaun Timor Leste nian.
Prinsipiu importante ba iha asegura liberdade imprensa ho di’ak liutan maka iha tinan 2018-2019, SEKOMS halo esbosu ba lei Rádiu Difuzaun (Undang-Undang Penyiaran) to’o agora iha hela parlamentu nasional.
“Iha tinan 2019 depois de Dili Diálogu Forum, atuál Prezidente Repúblika mak propoin, atu oinsá Governu buka dalan, atu apoiu média sira inklui média privadu sira, tamba kondisaun reál susar tebes wainhira hau ko’alia ho Primeiru Ministru aseita ona draf esbosu lei atu fó subsidiu ba média privadu sira, maibé Prezidente sesante veta tamba nemak SEKOMS seidauk apoiu ba media privadu”, dehan “AKARA”.
SEKOMS akresenta tan katak iha tempo besik , espera ho Prezidente foun agora ne’e bele hare fali Lei ida ne’e ho seriu.
Sekretariu Estadu Komunikasaun Sosial mós apresia no louva ba komportamentu media Hatutan.com nian, ne’ebé oferese ba nasaun ba Timor-Leste nomós halo servisu hodi hare balansu notísia nian (cheek/balance)hodi kontribui ba dezenvolvimentu nasionál liu-liu iha aspeitu komunikasaun no informasaun nian.
“Politika Governu nian mak atu garante liberdade imprensa no liberdade expresaun iha nivél Globál, katak ita nia liberdade di’ak liu iha ASEAN. em termus liberdade imprensa. Laos ita mak halo survey, tanba iha entidade ne’eb’e hetan konfiansa iha nivel Globál, hanesan Governu kontente tanba kontribui ona ba rezultadu di’ak ida ne’e” dehan “AKARA”.
“AKARA”, mos informa katak, Governu apoiu lei sira ne’ebé hatur iha komunikasaun sosiál, kona-ba liberdade imprensa, nomós liberdade oinsá atu koa’lia. Governu mós la permite atu intervem politika, ekonómia, iha konselu redasaun tanba koa’lia kona-ba liberdade imprensa xavi mak konsellu redasaun.
SEKOMS mós husu ba Média Hatutan.com atu kontribui ba informasaun, tanba Governu diversifika meius komunikasaun hotu iha konvensionál iha meius komunikasaun iha erá dijitál hotu, hakarak utiliza hodi transmiti informasaun ne’ebé los no kredivel ba nasaun. Tanba ho ida ne’e deit, mak hanesan Primeiru Ministru koa’lia partisipasaun komunidade bele iha bainhira rona informasaun loos no kredivel no sai sidadaun ne’ebé mak krititku.
Governante ne’e informa mós katak, tuir dadus iha Timor-Leste maioria jovem mak asesu iha plataforma dijitál ativu ho numero 78% iha media sociál tanba ema hotu iha smartphone. Governu hanoin katak, servisu hotu kria smartpeople para sai autór ba samartphone, nune’e bele kria smartcity iha tempo oin mai.
SEKOMS mós informa kona-ba eventu festivál kultura musika Ataúro nian, ne’ebé organiza husi Prezidente Repúblika sei hala’o iha fulan Novembru, no husu mós Content Creatór atu produz video no promove turizmu ba rai liur. Timor Leste nia imajem sai di’ak liu tan iha mundu nune’e ema bele vizita Timor-leste iha future papel média sai hanesan diplomatika hodi hamorin Timor- Leste nia naran iha mundu seluk.
SEKOMS mos husu “Content Creator” Youtuber sira kontribui ba dezenvolvimentu nasaun ida ne’e nian, tanba SEKOMS halo ona parseiru ho Content Creator sira hodi promove no kontribui ba eventual festival musika no kultura ne’ebé sei halao husi Prezidente Repúblika nian iha Ataúro.
Comment