Maubisse – 14/10/22 Sekretáriu Estadu ba Komunikasaun Sosiál (SEKOMS), Merício Juvinal dos Reis “AKARA”, Hamutuk ho Sekretáriu Estadu Arte no Kultura, Teofilo Caldas, Deputadu Parlamentu Nasionál, Patrocinio Fernandes, Sai Orador ba Kampaña Nasionál Kombate Hoax no Promove Internet Saúdavel, Liu husi Sensibilizasaun Literasia Dijitál, ba Estudantes Katolika iha Salaun Paroquial Imaculada Conceicao, Maubisse, Postu Adminstrativu Maubisse, Munisípiu Ainaro.
Merício Juvinal dos Reis “AKARA”, hateten Governu liu hosi SEKOMS kontinua promove edukasaun sivika ba sidadaun sira hodi uza plataforma dijitál ho efetivu, sivilizadu liu husi kampaña literasia dijitál liu husi sensibilizasaun literasia dijitál, nune’e sidadaun bele uza plataforma dijitál ho matenek.
“AKARA”, mós informa liu tan katak, HOAX hanesan informasaun ne’ebé falsu la bazeia ba faktus, manipula ka inventa deit informasaun hodi estraga ka manipula sidadaun sira atu labele fiar informasau loos.
“ Desenvolvimento globál liu husi plataforma digital oi-oin hakarak ka lakohi ita hotu tenki hetan no usa. Ses aan ladiak tamba maiória juventude no populasaun uza telefone android entaun otomatikamente aplikasaun iha plataforma dijitál iha kedan depende ema atu usa ho matenek no umanismu”. dehan “AKARA”.
Tempu uluk uza telefone alkatel kompara hanesan uza telefone ne’ebé ladun matenek agora mundu modernu ema hotu uza telefone matenek (smartphone) tamba nee ema ne’ebé maka uza telefone android tenki matenek ( smart people), Tenik “AKARA”
SEKOMS mós salienta katak, iha erá dijitál agora ne’ebé eziste iha mundu inklui Timor-Leste, Governu sei la taka dalan ba uzu plataforma sira liga ho dijital. Maibé oinsá prepara sidadaun sira atu bele utiliza meius komunikasaun liu husi plataforma dijitál no asesu informasaun lais no efetivu.
SEKOMS mós husu ba Estudante Sekundáriu Katolika Santo Inacio Loiola atu kontribui hodi kombate Hoax no Promove Internet Saúdavel, nomo’os atu badinas lee no estuda barak kona-ba Plataforma dijitál hodi nune’e iha hanoin ne’é bé kritiku no matenek.
Iha kampaña ne’e, SEKOMS fó mós tempu ba assesora SEKOMS, sra. “Pande”, hodi ko’alia kona ba uza plataforma dijitál ho efetivu no matenek.
Iha fatin hanesan, Sekretáriu Estadu Arte no Kultura (SEAC),Teofilo Caldas informa katak, plataforma dijitalizasaun ne’e liga ho kultura nomós, ba iha prespektiva kultura nian katak, ema la hanorin lia bosok, la fo informasaun falsu tanba agora mundu globalizasaun. Iha oportunidade direitu no dever hare’e no asesu informasaun sira.
“Naturalmente kultura liu husi SEAC promove hela no lansa ona programa tara bandu ba kombate HOAX nian, nune’e ema bele moris ho saudavel no moris informasaun ne’ebé dignu”
Entertantu Deputadu Parlamentu Nasionál, Patrocinio Fernandes, salienta tan katak, Kombate HOAX nee sai preokupasaun bo’ot ba Estadu no Governu, tanba ne’e hanesan deputadu atu sensibiliza informasaun sira ne’ebé liga ho meius komunikasaun sosiál nian, nomós vantajem no desvantajem uzu plataforma dijital sira tenki usa ho hanoin pozitivu.
Iha fatin hanesan Administadór Postu Administrativu Maubisse, Claudino Mendonca hato’o agradese ba SEKOMS ho komitiva ne’ebé mak mai sensibiliza informasaun kona-ba Kampana Hoax no Promove Internet Saúdavel ba Estudante Sekundária Katolika Santo Inacio Loiola Maubisse. Nune’e estudante sira bele uzu internet ho avontade maibe nafatin ho hanoin pozitivu no matenek.
Iha kampaña sensibilizasaun literasia dijitál ne’e, akompaña direta husi Diretór Edukasaun Munisipiu Ainaro, Komandante Polisia Nasional Timor Leste (PNTL) Postu Maubisse, Diretór Centro Formasaun Tecnica no Komunikasaun (CEFTEC), Diretor Nasional promosaun Desenvolvimento Media Local (DNPDML), funsionáriu Sekretria Estadu ba Komunikasaun Sosial (SEKOMS), Professor no Professora no Estudante sira husi Eskola Santo Inacio Loiola Maubisse.***
Comment