Sekretáriu Estadu ba Komunikasaun Sosiál, Merício Juvinal dos Reis “AKARA’, hato’o afirmasaun ne’e liu husi diskursu iha sermonia komemorasaun trajedia Balibo Five ba dala XLVI, iha Sabadu, loron 16 fulan-outubru, tinan-2021, iha Postu-Administrativu- Balibo, munisípiu-Bobonaro.
Merício Juvinal dos Reis “AKARA’, hateten, trajedia ne’ebé akontese iha tempu 1975 ne’ebé ohin loron hanoin hikas fali katak, jornalista sira hotu partisipa iha kualker sivilizasaun no mudansa iha ne’ebé de’it tanba jornalista eziste hodi hala’o kna’ar ne’ebé prinsipál ho prinsipiu ida deit servisu ba umanidade.
Jornalista nain lima (5) ne’ebé mate iha Balibo sai mós ezemplu ida ba mundu jornalizmu hodi defende lia los”, tenik “AKARA”
Ezekutivu hateten, Jornalista sira iha responsabilidade ne’ebé bo’ot tenke lori lia los ba mundu nafatin kontinua servisu iha paz ba rai ida ne’e.
“Jornalista labele sees husi espasu ida husi prosesu harii nasaun ne’e nian, sira nain lima hatudu ona ezemplu iha tempu difisil nia laran ohin loron ita hetan independénsia tan ne’e jornalista hala’o servisu tuir kode etika jornalizmu iha área komunikasaun no informasaun no informasaun iha konstrusaun estadu ida ne’e ba oin”, dehan “AKARA”.
Governante ne’e husu jornalista sira atu banati tuir jornalista nain lima nebe’e mate tanba Liberdade ukun rasik an.
Iha sorin seluk SEKOMS hatutan Governu iha komitmentu bo’ot hodi apoiu eventu Balibo Five, liu husi esforsu Konsellu Imprensa KI ho Centro Nasionál Chega(CNC-Sigla Portugés) ba futuru.
Iha oportunidade ne’e mós SEKOMS fahe premiu ba jornalista manan nain 2021 nian kona-ba obra jornalístiku iha ambitu komemorasaun Balibo Five.
Entertantu, jornalista nain lima ne’ebé mate iha loron 16, outubru, 1975 hanesan, Greg Shackelton ho idade 27, Tony Stewart idade 21, jornalista husi Nova Zelandia ne’ebé servisu iha estasaun televizaun chanal seven (7) iha Melbourne maka jornalista Brian Peters idade 29 ho nia kolega Malcolm Rennie idade 28, jornalista husi Inglaterra ne’ebé servisu iha stasaun TV chanel nine (9) iha Sydney maka jornalista Zealander ho Gary Cunningham ho idade 27.
Iha serimónia ne’e partisipa husi, Laureadu Novel da Paz no Eis Prezidenti da Repúblika, José Ramos Horta, Ministru Prezidénsia Konsellu Ministrus, Fidelis Leite Magalhães, Ministru Estatál, Miguel Perreira no Aútoriedade Sivil Militar, Aútoriedade Munisípiu Bobonaro, Bainaka importante balun no komunidade no jornalista sira.
Comment