Sekretáriu Estadu Komunikasaun Sosiál, Merício Juvinal dos Reis “AKARA”, ensera retiru ba Avaliasaun Programa SEKOMS Implementadu iha tinan 2021 ne’ebé sai hanesan sasukat ba Ezekusaun Planu Asaun Anuál tinan 2022, sexta-feira, loron 25 fulan-Fevereiru, tinan-2022, iha Rádiu Komunidade Tokodede, Liquiça.
Merício juvinal dos Reis “AKARA” konsidera retiru ne’e nu’udar reflesaun ida ba dirijente ho funsionáriu sira hodi deskobre no identifika idaidak nia frakeza ne’ebé komete iha tinan kotuk, nune’e bele hadi’a dezempeñu servisu iha tinan 2022.
SEKOMS realsa liuhosi retiru ne’e bele hametin liután relasaun entre dirijente no funsionáriu sira no hametin servisu iha ekipa hodi fó susesu ba implementasaun programa gabinete no diresaun ninian.
Ezekutivu ne’e husu mós ba dirijente no funsionáriu sira husi Gabinete no divizaun rua ne’ebé tutela iha SEKOMS atu kontinua hala’o servisu ho profisionalizmu no kumpri oras nian.
Iha loron daruak retiru ne’e, kontinua halo diskusaun no análize SWOT/FOFA (Forsa, Oportunidade, Frakeza, Ameasa) ba ezekusaun programa implementadu iha tinan 2021. Hafoin ne’e, kontinua kedas ho aprezentasaun Planu Asaun Anuál (PAA) 2022 husi kada diresaun ho utilizasaun métodu SWOT.
Comment