Sekretáriu Estadu ba Komunikasaun Sosiál, Merício Juvinal dos Reis “AKARA”, reprezenta Ministru ba Asuntu Parlamentár no Komunikasaun Sosiál, Francisco da Costa Pereira Jerónimo, partisipa iha reuniaun plenária, segunda-feira, loron 31 fulan-maiu tinan 2021, iha Uma Fukun Parlamentu Nasionál.
Reuniaun plenária ne’e hahú ho aprezentasaun relatóriu husi Komisaun Ekonomia no Dezenvolvimentu relasiona ho vizita traballu ne’ebé hala’o ba iha AIFAESA no SERVE no deklarasaun polítika husi bankada parlamentár sira.
Iha plenária ne’e, deputadu sira hato’o preokupasaun kona-ba situasaun pandemia Covid-19 iha rai-laran, fornesimentu hahan ba pasiente Covid-19 sira iha fatin izolamentu, falta ai-han ba populasaun sira durante períodu serka sanitária, utilizasaun ID falsu iha mídia sosiál hodi defama ka insulta líder nasionál sira no atuasaun membru PNTL ba sidadaun sira ne’ebé la tuir lei no orden.
Aleinde ne’e, membru Parlamentu Nasionál sira hato’o mós preokupasaun seluk kona-ba problema estrada, edukasaun, saúde no eletrisidade.
Iha biban ne’e, Bankada PD rekomenda ba Ministériu ba Asuntu Parlamentár no Komunikasaun Sosiál atu rekolla dokumentasaun sira ne’ebé produz husi mídia indonézia iha Timor-Leste iha pasadu nune’e bele sai hanesan arkivu nasionál.
Hafoin rona tiha preokupasaun no rekomendasaun husi deputadu sira, Sekretáriu Estadu ba Komunikasaun Sosiál, Merício Juvinal dos Reis “AKARA”, hateten relatóriu ne’ebé komisaun sira aprezenta no preokupasaun deputadu sira nian sei enkamiña fila-fali ba iha ministériu relevante sira hodi fó resposta tuir orsamentu ne’ebé previstu ona.
Relasiona ho deklarasaun polítika husi Bankada KHUNTO kona-ba implementasaun eskola online, SEKOMS afirma Governu rekoñese difikuldade ne’ebé hasoru iha implementasaun ensinu online. Tuir Merício Juvinal dos Reis “AKARA, nia parte simu informasaun husi Ministériu Edukasaun, Juventude no Desportu katak estudante porsentu 30 de’it maka asesu ba eskola online iha teritóriu nasionál no maiór parte la asesu. Tanba ne’e, Governu kolabora ho profesór sira hodi halo rezumu ba matéria hotu nune’e bele distribui ba estudante sira.
Ezekutivu ne’e realsa Governu mós sei orienta profesór sira atu simu vasina kontra Covid-19 nune’e bele seguru bainhira hanorin estudante sira no sei asegura katak eskola hothotu sei dezinfetadu hodi prevene transmisaun Covid-19.
Hatan kona-ba estrada, Governante ne’e hateten reabilitasaun estrada ne’ebé liga Viqueque ba postu administrativu Uatucarbau, Iliomar no Lospalos integra iha planu tinan 2022. Enkuantu, estrada diresaun Baucau no Viqueque sei iha hela prosesu reabilitasaun.
Ligadu ho eletrisidade, líder máximu SEKOMS ne’e informa suku 70 resin iha teritóriu nasionál maka seidauk asesu ba enerjia elétrika. Tanba ne’e, Governu preve ona orsamentu atu rezolve problema eletrisidade to’o tinan 2022.
Relasiona ho rekomendasaun husi Bankada PD, SEKOMS hateten sei kolabora ho mídia nasionál Indonézia ne’ebé halo dokumentasaun iha Timor-Leste durante tenpu okupasaun Indonézia hodi rekolla fila-fali dokumentu hirak ne’ebé to’o agora sei arkivadu hela.
Iha fatin hanesan hatan kona-ba ID falsu iha rede sosiál, Merício Juvinal dos Reis “AKARA” salienta Governu implementa ona estratéjia balun hodi aselera edukasaun sívika atu nune’e sidadaun sira bele adapta era dijitál liuliu oinsá bele uza plataforma dijitál ho di’ak hodi kontribui ba prosesu sivilizasaun iha futuru no hala’o mós kampaña nasionál kontra HOAX hodi kombate informasaun falsa no promove internet saudável iha sosiedade.
Estratéjia seluk maka presiza kria lei ida hodi kombate HOAX no Governu hahú hanoin ona atu elabora lei kona-ba kombate informasaun falsa iha Timor-Leste.
Governante ne’e reforsa SEKOMS forma ona ekipa ida hodi rekolla dadus kona-ba informasaun falsa ka HOAX iha mídia sosiál no to’o oras ne’e ekipa deteta ona ID falsu besik 30 iha rede sosiál.
Comment