SEKOMS sei Kolabora ho The Kraken Band hodi Promove Servisu Komunikasaun Sosiál
Sekretáriu Estadu ba Komunikasaun Sosiál, Merício Juvinal dos Reis “AKARA”, hateten SEKOMS sei kolabora ho grupu banda muzikál sira atu hato’o mensajen Estadu nian liga ho dezenvolvimentu, informasaun no edukasaun sívika liuhosi múzika.
AKARA hato’o deklarasaun ne’e wainhira marka audénsia ho Grupu The Kraken Band, segunda-feira, loron 17 fulan-agostu, tinan 2020, iha sala reuniaun, SEKOMS, iha Palásiu Governu, Dili.
Ezekutivu ne’e hateten SEKOMS sei servisu hamutuk ho banda muzikál ne’e atu promove programa Naroman ba Suku ne’ebé barak liu sei hala’o iha suku sira.
“Hau sei konvida Grupu The Kraken sei partisipa, kontribui iha parte animasaun nian, fahe experiénsia kona-ba oinsá joven sira halo planu ba moris ne’ebé di’ak liu, la’ós de’it iha nível nasionál, maibé mós iha munisípiu”, tenik AKARA.
Líder máximu SEKOMS ne’e haktuir nia parte sei hala’o enkontru tuir mai ho nível tékniku operasionál atu haree oinsá hahú dezenvolve publisidade kona-ba atendimentu públiku, liuliu ligadu ho jestaun lixu, jardin, kombate lia falsu no edukasaun sívika.
Iha fatin hanesan, Koordenador Grupu The Kraken Band, Natalino Fernades, kongratula ho inisiativa SEKOMS ne’ebé hakarak halo kooperasaun ho Grupu The Kraken Band hodi promove programa instituisaun Estadu ne’e nian liuhosi múzika.
Comment