Servisu Rádiu Komunitáriu Tenke Funsiona ho Normál
Sekretáriu Estadu ba Komunikasaun Sosiál, Merício Juvinal dos Reis “AKARA” hateten prosesu servisu iha rádiu komunitáriu sira tenke funsiona ho normál no elabora planu hamutuk inklui halo avaliasaun servisu.
Merício Juvinal dos Reis “AKARA” hato’o afirmasaun ne’e wainhira asina kontratu Fundu Tranferénsia Públiku (FTP) ba fulan agostu, setembru no outubru ho Rádiu Komunidade sira, segunda-feira, loron 17 fulan-agostu tinan 2020, iha salaun ANC, Merkadu-Lama, Dili.
Ezekutivu ne’e hateten polítika SEKOMS la’ós de’it dezenvolve Rádiu Komunidade sira, maibé sei dezenvolve mós média iha munisípiu sira.
Sekretáriu Estadu hatutan ekipa SEKOMS sei tun ba baze hodi identifika funsionamentu média munisípiu sira.
Merício Juvinal dos Reis “AKARA” realsa Rádiu Komunidade tenki sai leitór ba dezenvolvimentu média iha munisípiu.
Comment