SEKOMS informa progresu revizaun proposta Orsamentu Jerál Estadu-OJE 2020 ba PN

Iha reuniaun líderes bankadas parlamentares ne’e, S.E, Sr. Merício Juvinal dos Reis “AKARA” nu’udár portavoz governu hato’o ba líderes bankadas kona-ba progresu revizaun ba proposta Orsamentu Jerál Estadu-OJE 2020, hafoin governu retira proposta OJE iha loron daruak diskusaun proposta orsamentál ne’e.

“Ohin parte governu nian iha pontu ida de’it liga ba diskusaun Orsamentu Jerál Estadu 2020. Hau informa katak horiseik Primeiru-Ministru orienta no forma ona ekipa atu halo revizaun ne’ebé lidera husi Ministru Prezidénsia Konsellu Ministru, Ministra Finansas, Ministru Edukasaun, Ministru Transporte no Telekomunikasaun, ne’ebé nain hat sei lidera revizaun ne’e, no ita servisu tuir data ne’ebé Primeiru-Ministru deklara katak iha dia 13, tuir ita nia planu sei lori fali mai plenária.
Ne’ebe ohin ha’u informa ba deputadu sira katak iha prosesu revizaun ne’e ekipa presiza tan tempu, ami sei informa fali mai parlamentu bainhira iha mudansa ba data, mas agora dadaun ami servisu tuir data ne’ebé Primeiru-Ministru deklara”, hateten S.E.Sekoms.

S.E Sr. Merício Juvinal dos Reis “AKARA” hatutan parte parlamentu simu explikasuan husi governu no husu banhira iha mudansa ruma governu sei informa no parlamentu prontu atu ajusta.

Iha biban ne’e, hatan kona-ba valor redusaun ba proposta OJE, Sekretáriu Estadu ba Komunikasaun Sosiál, S.E Sr. Merício Juvinal dos Reis “AKARA” to’o oras ne’e seidauk hatene númeru fixu husi orsamentu tanba ekipa sei halo hela revizaun hodi buka hatene verba ida ne’ebé mak presiza halo redusaun.

“Ekipa sei halo lai tanba ami labele deside kedas atu hatan to’o numeru fixu hira, no husi ekipa ne’e mak sei haree item ne’ebé mak tenki reduz tantu iha bens e servisu ka transferénsia públika,, agora seidauk iha númeru fixu atu hatun to’o hira, klaru katak sei reduz tuir preokupasaun ne’ebé deputadu sira hato’o, tanba ne’e diak liu tenki hein lai ekipa revizaun halo ninia servisu”, afirma S.E.Sekoms

Governu retira proposta OJE tanba konsidera preokupasaun sira ne’ebé razoavel husi deputadu no povu relasiona ho valor OJE ne’ebé elevadu.

Media SEKOMS