by

MAPKOMS INTERINU PARTISIPA IHA REUNIAUN PLENÁRIA ORDINÁRIA IHA PARLAMENTU NASIONÁL

Ministru Interinu Asuntu Parlamentár no Komunikasaun Sosiál, Merício Juvinal dos Reis “AKARA”, partisipa iha reuniaun plenária Parlamentu Nasionál, segunda-feira, loron 04 fulan-Abril, tinan-2022, iha Uma Fukun Parlamentu Nasionál.

Antes tama ba períodu Ordem do Dia, Deputadu sira diskute kona-ba pedidu justifikasaun falta husi Deputadu António de Sá Benenvides e Mariano Assanami no Deputadu Cidalia Mesquita Ximenes, tuir kedas ho deklarasaun polítika husi bankada parlamentár.

Iha intervensaun diversas, Deputadu sira hato’o mós preokupasaun oioin liga ho problema edukasaun, saúde, estradas, problema labarik, restus mortais eroi nasionál ne’ebé to’o ohin loron seidauk hetan , fundus COVI-19 no seluk tan.

Ministru Interinu Asuntu Parlamentár no Komunikasaun Sosiál, Merício Juvinal dos Reis “AKARA” iha ninia intervensaun konsege hatan preokupasaun kona-ba transferénsia fundu husi SECOOP ba RTTL-EP ne’ebé kestionada husi Deputada Fernanda Lay iha plenáriu semana katak, SECOOP iha programa ida hanaran sensivilizasaun informasaun no edukasaun, no atu implementa programa ne’e presiza servisu hamutuk ho RTTL,EP hodi disemina informasaun kona-ba atividade SECOOP nian ba públiku liuhosi asina akordu ida ho RTTL-EP hanesan mídia Estatál.

Liga ho Jardim ne’ebé sei halo iha Muzeu Rezisténsia nia sorin, Ministru interinu MAPKOMS afirma prosesu administrativamente la’o di’ak no oras ne’e tama ona iha konkursu ho finansiamentu maihusi fundus estrutura grande projetu.

Relativamente ho estudante sira ne’ebé fila mai Timor-Leste durante pandemia COVID-19 no hakarak fila-fali ba Xina atu kontinua estudu, Merício Juvinal dos Reis Äkara”hatete nia parte simu ona informasaun husi MESCC katak preokupasaun estudante sira nian iha ona atensaun no oras neé hein deit desizaun husi Ministériu Finansas.

Enkuantu preokupasaun sira seluk ne’ebé seidauk fó resposta, MAPKOMS sei enkamiña ba ministériu kompetente atu buka solusaun.

Comment

Leave a Reply

Your email address will not be published. Required fields are marked *

News Feed