MALÁZIA (MÍDIA SECOMS) — Penang, 20 Juñu 2026 – Sekretáriu Estadu Komunikasaun Sosiál (SEKOMS), Expedito Loro Dias Ximenes, akompaña husi Prezidente Ajénsia Notisioza TATOLI, Noemio Mateus Soares Falcão, hala’o reuniaun ho Ministru Komunikasaun Malázia, Datuk Fahmi Fadzil, ne’ebé akompaña mós husi estrutura Ajénsia Notisioza BERNAMA.
Iha sorumutu ne’e, parte rua diskute kona-ba oportunidade kooperasaun iha área komunikasaun nian entre Malázia no Timor-Leste.
Iha reuniaun ne’e, parte rua troka hanoin kona-ba oinsá bele hametin relasaun bilaterál, liuliu iha setór komunikasaun no média. Kooperasaun ne’e ho objetivu atu aumenta kapasidade instituisaun sira nian, hodi promove dezenvolvimentu informasaun ne’ebé profisionál, kredivel no responsável.
Tema prinsipál sira ne’ebé sai nu’udar asuntu diskusaun mak, Kooperasaun iha utilizasaun no regulasaun Intelijénsia Artifisiál (IA), Estratéjia atu kombate lia-falsu (hoaks) no dezinformasaun, Importánsia husi formasaun kontinua ba jornalista sira iha Timor-Leste, hodi hasae kualidade reportajen no adaptasaun ho mudansa teknolójika.
Iha oportunidade ne’e, Sekretáriu Estadu SEKOMS, Expedito Loro Dias Ximenes, mós hato’o preokupasaun kona-ba nesesidade atu iha prezensa no envolvimentu husi plataforma digitál boot sira hanesan Google, YouTube, no Facebook iha Timor-Leste. Esforsu ne’e hodi bele fó kontribuisaun di’ak liu ba ekosistema média no komunikasaun nasionál.
Iha parte seluk, Ministru Komunikasaun Malázia, Datuk Fahmi Fadzil, iha nia intervensaun subliña katak kooperasaun entre Malázia no Timor-Leste iha área komunikasaun sei sai kle’an liu tan ho implementasaun akordu kooperasaun ne’ebé asina ona entre Ajénsia Notisioza BERNAMA no Ajénsia Notisioza TATOLI.
“Akordu refere sei sai baze importante ida atu promove partilla esperiénsia, dezenvolvimentu rekursu umanu, troka informasaun, no fortalesimentu kapasidade profisionál ba instituisaun média governamentál iha nasaun rua, hodi responde ba dezafiu komunikasaun iha era digitál,” Datuk Fahmi Fadzil hateten.
Comment