PENANG, MALÁZIA (MÍDIA SECOMS) — Timor-Leste ofisialmente partisipa ona iha selebrasaun Loron Imprensa Nasionál Malázia (HAWANA 2026) ne’ebé hala’o iha Illa Penang, Malázia, iha loron sabadu (20/06/2026) liu ba.
Iha eventu boot ne’e, Ajénsia Notisioza Timor-Leste (TATOLI) asina mós akordu kooperasaun ho Ajénsia Notisioza Malázia (BERNAMA) hodi hametin relasaun média nian iha rejiaun.
Partisipasaun ne’e reflete kompromisu forte Timor-Leste nian hodi hafoun no hametin liután kooperasaun ho Malázia. Delegasaun Timor-Leste ne’e lidera husi Sekretáriu Estadu Komunikasaun Sosiál (SEKOMS), Expedito Loro Dias Ximenes, no akompaña husi Prezidente TATOLI, Noemio Mateus Soares Falcão.
Iha okaziaun ne’e, hala’o mós serimónia troka dokumentu ofisiál akordu kooperasaun nian husi Sekretáriu Estadu SEKOMS, Expedito Loro Dias Ximenes, ho Ministru Komunikasaun Malázia, Datuk Fahmi Fadzil. Serimónia ne’e hetan sasin direta husi Primeiru-Ministru Malázia, Anwar Ibrahim.
Akordu foun ne’e sei fó oportunidade boot ba instituisaun rua (Tatoli no Bernama) hodi Fahe informasaun no dezenvolvimentu foun husi nasaun rua hotu, Dezenvolve kbiit jornalista sira-nian liuhosi formasaun, Fahe esperiénsia kona-ba oinsá jere ajénsia notisioza iha tempu modern, Hatene uza Intelijénsia Artifisiál (AI) ho loloos no kombate dezinformasaun (notísia falsu).
Ministru Komunikasaun Malázia, Datuk Fahmi Fadzil, subliña katak kooperasaun ne’e importante tebes hodi promove serbisu hamutuk iha área jornalizmu, liuliu tanba Timor-Leste agora sai ona nu’udar família boot iha ASEAN.
Iha fatin hanesan, Primeiru-Ministru Malázia, Anwar Ibrahim, iha nia diskursu foti istória kona-ba filozofu gregu Socrates nu’udar sasin hodi defende liberdade espresaun no imprensa iha mundu. Nia mós hateten katak papél média nian importante tebes ba dezenvolvimentu nasaun nian.
HAWANA 2026 ne’ebé organiza husi BERNAMA ne’e hetan partisipasaun másimu husi nasaun sira iha Sudeste Aziátiku (ASEAN). Eventu ne’e hatudu vontade forte husi nasaun membru sira hodi hametin amizade no hamutuk responde ba dezafiu iha mundu dijitál, liuliu hasoru informasaun falsu, dezinformasaun, no dezafiu foun husi teknolojia Intelijénsia Artifisiál.
Comment