BAUCAU (MÍDIA SECOMS) — Sekretaria Estadu ba Komunikasaun Sosiál (SEKOMS) implementa edisaun datoluk Programa “Meet The Press ” 2026, ho tema “Implementasaun Desentralizasaun no Poder Lokál iha Timor-Leste”. Eventu ne’e realiza iha Munisípiu Baucau, espesifikamente iha rezidénsia Prezidente autoridade Munisipál Vilanova.
Objetivu prinsipál programa ne’e konsiste iha estabelese espasu diálogu aberta entre órgaun komunikasaun sosiál, autoridade munisípal, hodi fasilita distribuisaun informasaun kredível ba públiku kona-ba polítika no planu Governu nian iha dezenvolvimentu nasionál. Programa ne’e mós klarifika progresu no obstákulu sira ne’ebé relasiona ho prosesu desentralizasaun iha nasaun ne’e.
Orador prinsipál iha programa ne’e mak Ministru Administrasaun Estatál (MAE), Señor Tomas do Rosário Cabral, ne’ebé aprezenta perspetiva kona-ba implementasaun desentralizasaun no poder lokál. Programa ne’e modera diretamente hosi Sekretáriu Estadu ba Komunikasaun Sosiál (SECOMS), Señor Expedito Loro Dias Ximenes.
Tuir planu, inisiativa ne’ebé inisia iha Munisípiu Baucau sei kontinua implementa iha munisípiu sira seluk, hodi garante informasaun kona-ba dezenvolvimentu bele atinji populasaun iha área rurál.
Atividade ne’e remata ho sesaun pergunta no resposta entre jornalista no orador, hodi kria kobertura jornalístika ne’ebé profunda no balansu ba sosiedade Timor-Leste nian.
Programa Meet The Press ne’e hetan partisipasaun hosi Prezidente Autoridade Munisípiu Baucau, Prezidente Autoridade Munisípiu Lautem, autoridade lokál Baucau, no hetan kobertura hosi Rádiu Komunitária Baucau, média konvensionál, no plataforma média online.
Comment