Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o afirmasaun ne’e bainhira hala’o vizita koortezia ba Rádiu Komunidade “Rai Husar”, tersa-feira, loron 08 fulan-Marsu, tinan-2022, iha Edifísiu Rádiu Komunidade “Rai Husar”, Munisípiu-Aileu.
Merício Juvinal dos Reis “AKARA” hateten, Governu apresia ezisténsia rádiu komunidade no iha inisiativa apoia nafatin, laos fó deit insentivu maibé haree aspetu seluk hanesan, infraestrutura, ekipamentus, rekursu umanu no programa ka konteúdu ne’ebé iha.
“Rádiu komunidade importante hanesan meius komunikasaun ida ne’ebé besik liu ita nia komunidade no nain ba komunidade, maibé husu progresu sira tenke iha no nesesidade sira di’ak hodi responde,”, dehan “AKARA”.
“AKARA”, esklarese rádiu komunidade presiza iha jestaun ida ne’ebé di’ak, tenke kontinua servisu tuir grella ka matadalan programa rádiu nian hanesan Talkshow, notísia, drama no publisidade sira.
Liga ba edifíu rádiu komunidade ne’ebe kiik, Ezekutivu ne’e husu atu identifika nesesidades sira bele tau iha planu hodi dezenvolve mós mídia iha munisípiu, tau orsamentu hodi bele harii edifísiu ida ba mídia munisípiu nune’e rádiu komunidade bele utiliza.
Governante ne’e apresia ba jestór no jornalista rádiu komunidade “Rai Husar” Aileu ho espiritu voluntarismu maibe nafatin servisu di’ak, no husu komunidade Aileu konsidera nafatin rádiu komunidade hanesan meius komunikasaun tanba komunidade mak nain ba rádiu komunidade hodi responde prioridade iha interese hodi promove iha lian, kultura, produtu lokál, ekonómiku no sosiál.
Entertantu Diretór Nasionál Promosaun Dezenvolvimentu Mídia Lokál-DNPDML, José da Costa hateten, Fundus transferensia Públiku FTP nebe’e SEKOMS-DNPDML aloka ba Rádiu Komunidade sira bazea ba proposta nesesidade rádiu nian.
Vizita ne’e aliende SEKOMS, Partisipa hosi Administradór Munisípiu Aileu no akompaña mos hosi Diretór DNPDML, ho ekipa.
Comment