Sekretáriu Estadu ba Komunikasaun Sosiál, Merício Juvinal dos Reis “AKARA”, hala’o sorumutu ho Espesialista Analiza Mídia hosi Uniaun Europeia, Agnes DOKA, ho nia ekipa hodi koa’lia kona-ba kna’ar mídia nian no dezenvolvimentu mídia iha Timor-Leste.
Sorumutu ne’e, hala’o iha kuarta-feira, loron 09 fulan-Marsu, tinan 2022, iha sala reuniaun SEKOMS, Palásiu Governu, Dili.
Merício Juvinal dos Reis “AKARA” hateten ekipa husi Uniaun Europeia hakarak hatene servisu SEKOMS nian no dezenvolvimentu mídia iha Timor-Leste. Aleinde ne’e sira-nia prezensa iha Timor-Leste atu halo observasaun ba servisu mídia nian durante períodu kampaña eleisaun prezidénsiál, iha ne’ebé sei haree liu kona-ba lei regulamentasaun, liberdade imprensa no espresaun no lei rádiudifuzaun.
SEKOMS afirma iha sorumutu ne’e mós nia parte informa ba ekipa observadora husi Uniaun Europeia ne’e kona-ba programa prioritáriu husi Governu liuhosi SEKOMS maka kontinua hala’o kampaña ba kombate HOAX ka Fake News iha rai-laran no promove internet saudável hodi hasa’e konsiénsia komunidade sira-nian kona-ba utilizasaun rede sosiál ho loloos.
Relasiona ho kobertura mídia iha kampaña eleitorál prezidénsiál, Governante ne’e reforsa SEKOMS servisu hamutuk ho Konsellu Imprensa organiza ona breafing ida ba jornalista sira atu nune’e bele promove peace Journalism ka jornalista ba dame durante períodu kampaña eleitorál Prezidente Repúblika no ezerse funsaun ho imparsiál, profisionál no kumpri kódigu étika jornalizmu.
Durante sorumutu ne’e mós, Uniaun Europeia husu ba SEKOMS atu relata mós dadus kona-ba persepsaun públiku ligadu ho konteúdu informasaun publikadu husi media sira, hanesan iha televizaun, rádiu, jornál no mídia online sira.
Comment