Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o informasaun ne’e ba jornalista sira hafoin hala’o enkontru ho eselénsia Primeru Ministru Taur Matan Ruak hodi atualiza progresu servisu SEKOMS iha Tersa-Feira, loron 29 fulan-Marsu, tinan 2022, iha sala reuniaun PM-Palásiu Governu, Dili.
Merício Juvinal dos Reis “AKARA”, hatete, orientasaun husi Primeiru Ministru ohin hodi tau atensaun ba imajem Governu nian ne’ebé durante ne’e hetan ataka maka’as husi entidades balu.
“Primeiru Ministru fó hanoin hodi konsolida servisu iha área komunikasaun sosiál atu hadia no kompleta servisu tinan kotuk ne’ebé la konsege halo ho di’ak no antes atu remata tinan ida ne’e tenke hadia no hatudu ba públiku atijimentu perioride VIII Governu nian dehan “AKARA”.
Ezekutivu ne’e akresenta hanesan Sekretáriu Estadu ba Komunikasaun Sosiál, kolabora nafatin ho meius komunikasaun sosiál sira liuliu meius komunikasaun estadu nian atu ajuda Governu hodi hatutan rezultadu servisu ne’ebé mak Governu iha no Planu Governu tinan ida ne’e no oin mai atu halo tan para publiku bele akompaña nune’e povu bele hetan informasaun loos no kredivel.
“Ezekutivu ne’e mos informa ba Primeiru Ministru katak, nia ho nia ekipa prontu koordena ho mídia estadu hodi divulga informasaun lolos no kredivel no hasa’e ritmu informasaun kona-ba Governu nian.
“AKARA” subliña hanesan membru Governu ida ne’ebé responsavel iha área komunikasaun sei servisu makas iha kampaña eleisaun prezidensiál hodi kombate HOAX no propaganda polítika hodi neutraliza informasaun sira ne’ebé mak ladun di’ak hasoru Governu.
Governante ne’e hatutan tan enkontru ne’e Primeiru Ministru orienta nafatin SEKOMS atu halo servisu ho profisionál liu tan, hadi’ak liu tan servisu hodi atinji rezultadu iha tinan ida ne’e no oin mai no mantein halo kolaborasaun di’ak ho mídia no meius komunikasaun sira.
Comment