DILI (MÍDIA SECOMS) — Sekretariu Estadu Komunikasaun Sosiál (SECOMS), Expedito Loro Dias Ximenes, loke ofisiálmente programa formasaun multimédia ba partisipante sira hosi Empresa Públika Rádio no Televizaun Timor-Leste (RTTL, E.P), iha Hotel Timor, Dili. Formasaun ne’e organiza hosi ABC International Development (ABC ID).
Objetivu prinsipál formasaun ida ne’e mak atu reforsa no kria diversifikasaun kapasidade jornalista sira nian, liuliu iha área programasaun, hodi bele prodús programa ho kualidade.
Sekretáriu Estadu ne’e agradese ba ABC International Development, tanba apoiu ne’ebé fó ba RTTL, E.P. no Agénsia Notísia Timor-Leste (TATOLI) hanesan kanál ofisiál Estadu nian ba korespondensia no distribuisaun informasaun ba públiku.
“Agradese ba ABC ba apoiu ne’ebé fó mai RTTL no mós Ajénsia Tatoli nu’udar Kanál ofisiál Estadu rua ne’e mak sai baze ba hodi divulga informasaun ba públiku,” dehan SECOMS Expedito.
Sekretáriu Estadu mós husu deskulpa ba jornalista RTTL, E.P sira tanba limitasaun orsamentu no fasilidade operasionál ne’ebé dala barak afeta kobertura iha terenu.
Atu responde ba dezafiu sira ne’e, SECOMS fó ona orientasaun ba Prezidente no Diretór Ezekutivu RTTL nian atu prepara orsamentu ne’ebé di’ak liu ba tinan oin mai.
“Iha orsamentu 2027 ba oin, liliu atu hasoru Eleisaun Prezidensiál no Eleisaun Parlamentár 2028, ha’u hein katak ita-boot sira-nia proposta presiza hatama tan orsamentu operasionál ba produsaun programa, nune’e mós hadi’a transporte ne’ebé aat no sosa ekipamentu foun hodi akompaña transformasaun teknolojia nian,” nia haktuir.
Nia dehan mós katak, hanesan funsionáriu públiku, RTTL tenke iha uniforme ne’ebé hatudu identidade.
Iha okaziaun ne’e, Sekretáriu Estadu husu mós ba jornalista no funsionáriu RTTL, E.P tomak atu hatudu lealdade, servisu ho onestidade, no defende kredibilidade instituisaun nian bainhira simu krítika hosi liur.
“Nu’udar ema ne’ebé serbisu iha RTTL, ita-boot sira tenke defende RTTL ho sentimentu pertensa. Se karik ema ruma krítika RTTL, ita-boot sira mak tenke defende iha públiku. Ne’e mak ita bolu lealdade ba serbisu no instituisaun, ba Governu no ba Estadu,” nia tenik.
Formasaun multimédia ida ne’e sei hala’o durante loron rua no sei partisipa hosi jornalista no tékniku sira hosi departamentu programasaun RTTL, E.P nian.
Comment