CUBA sei Halo Kooperasaun ho Governu Timor-Leste iha Área Komunikasaun Sosiál
Governu Cuba sei estabelese kooperasaun ho Governu Timor-Leste iha área komunikasaun sosiál.
Sekretáriu Estadu ba Komunikasaun Sosiál, Merício Juvinal dos Reis “AKARA” hato’o afirmasaun ne’e wainhira simu vizita husi Embaixadór Cuba iha Timor-Leste, Oma L. Arrero Bentacourt, segunda-feira, loron 17 fulan-agostu tinan 2020, iha sala reuniaun SEKOMS, iha Palásiu Governu, Dili.
Durante ne’e, nasaun rua iha ona kooperasaun iha área saúde, edukasaun no seluk tan no iha enkontru ne’e, parte rua explora ideia oinsá atu hala’o mós kooperasaun iha área komunikasaun sosiál.
SEKOMS hateten ho kooperasaun ne’e bele possibilita profisionál komunikasaun sosiál sira atu partilla ideia no experiénsia iha eventu importante balun iha Cuba ka iha Timor-Leste.
Iha oportunidade ne’e, Diplomata Cubano ne’e promete sei tulun Governu Timor-Leste iha área komunikasaun sosiál nian liuhosi kooperasaun ho SEKOMS.
Fó hanoin hikas fali katak, Governu Cuba fó ona apoiu ba Timor-Leste iha área oioin desde nasaun ne’e restaura ninia independénsia.
Comment