Sekretáriu Estadu ba Komunikasaun Sosiál, Merício Juvinal dos Reis “AKARA”, hato’o afirmasaun ne’e, hafoin serimónia entrega termu servisu husi Diretór Sesante Diresaun Nasionál Dezenvolvimentu no Promosaun Media Lokál-DNDPML, Abel da Conceição ba Sekretária Estadu ba Komunikasaun Sosiál, kuarta-feira, loron 24 fulan-fevereiru tinan 2021, iha sala reuniaun SEKOMS, Palásiu Governu, Dili.
Merício Juvinal dos Reis “AKARA”, hateten, iha serimónia ne’e, Diretór Sesante simu ona posse nu’udar Administradór Munisípiu Aileu, ne’ebé antes hanesan mós Diretór Sentru Rádiu Komunidade.
Durante servisu tinan rua, Diretór Sesante, konsege transforma sentru Rádiu Komunidade ba Diresaun foun ho naran Diresaun Nasionál Dezemvolvimentu no Promosaun Media Lokál, transforma mós Sistema radio komunidade hodi iha asesu ba live streaming no rezultadu servisu sira mak oras ne’e sentru rádiu komunidade sanulu resin neen maioria iha ona rádiu streaming, ida ne’e rezultadu servisu pozitivu husi Diretór Sesante, “tenik AKARA”.
Iha serimónia ne’e mós, SEKOMS hato’o parabens ba Administradór foun Munisípiu Aileu, tanba simu ona posse iha loron horseik.
Ezekutivu ne’e afirma hahú ohin ba oin, iha ona Diretór Interinu maibé SEKOMS sei haree Diretór foun hodi lidera fali diresaun ne’e. Nomeasaun ida ne’e halo ona no entrega ona ba Ministru MAPKOMS hodi transmite ba Funsaun Públiku, hein hela karta ofisiál husi Funsaun Públiku ba Diretór foun atu hala’o fali kna’ar ne’e.
Aleinde ne’e mós Diretór Sesante DNDPML, Abel da Conceição agradese ba fiar ne’ebé SEKOMS fó durante tinan rua hodi aprende buat foun ne’ebé iha nível nasionál. Diretor ne’e espresa nia espetativa ba diretór foun ne’ebé SEKOMS nomeia sei kontinua servisu di’ak liu tan iha área komunikasaun sosiál.
Iha serimónia ne’e mós partisipa husi Sekretáriu Estadu Arte no Kultura, Teofilo Caldas, Prezidente RTTL.EP, Vise Prezidente Tatoli.IP, Diretór Jerál MAPKOMS, Diretores, Asesor no Tekniku Profisional Espesializadu sira SEKOMS nian.
Comment