Orientasaun ne’e hato’o husi Sekretáriu Estadu ba Komunikasaun Sosiál, Merício Juvinal dos Reis “AKARA”, bainhira hala’o enkontru ho Diresaun Nasionál Promosaun Dezenvolvimentu Mídia Lokál, kinta-feira, loron 25 fulan-fevereiru tinan 2021, iha sala reuniaun Rádiu Tokodede, Munisípiu Likisa.
Mericio Juvinal dos Reis “AKARA, orienta Diretór Interinu DNPDML, José Costa, ho nia Xefe Departamentu sira, tenke aselera lalais liu tan realizasaun ka ezekusaun programa enkorajamentu diversifikasaun meius komunikasaun sosiál iha diresaun, ne’ebé kompostu husi sub programa boot tolu, sub programa Naroman ba Suku, sub Programa Mídia Munisipál, no Sub programa Rádiu komunidade.
Atu aselera no dudu ezekusaun di’ak no lais ba SEKOMS nia programa komunikasaun sosiál tinan 2021, liuliu programa Enkorajamentu diversifikasaun meius komunikasaun sosiál, ne’ebé haree ba knaar Diresaun Nasionál Promosaun no Dezenvolvimentu Mídia Lokál, tenik “AKARA”
SEKOMS mós husu ba ekipa téknika profisionál ne’ebé SEKOMS rekruta hodi hala’o knaar apoia direita realizasaun programa SEKOMS, iha diresaun sira, programasaun sira hodi haforte liu tan knaar ba DNPDML, liuliu tenke finaliza lalais ‘’matrix plan’’ ezekusaun programa DNPDML tinan 2021, no apoia realizasaun ona planu hirak ne’e iha fulan fevereiru no fulan marsu 2021.
Responde ba orientasaun husi SEKOMS, Diretór Interinu, José Costa, hato’o katak, parte DNPDML, ne’ebé apoia husi ekipa tékniku ba diresaun ne’e, dezenvolve tiha ona ‘’matrix plan’’ ezekusaun programa DNPDML tinan 2021, no hein hela atu ajusta tan buat balu hodi kompleta, iha semana ikus fulan fevereiru 2021. Kona ba realizasaun atividade ka programa iha fulan Fevereiru no Marsu 2021, DNPDML realiza tiha ona atividade transfere fundu sira husi tranferensia públiku parte dahuluk nian ba rádiu komunidade sira, iha semana klaran fulan Fevereiru tinan 2021, apoia tiha ona realizasaun diálogu komunitária ida iha Suku Seloi Kraik, Munisípiu Aileu, no hato’o tiha ona pedidu realizasaun atividade seluk tan iha fulan Marsu nia laran ba Gabinete SEKOMS no diresaun finansas MAPKOMS/SEKOMS, ne’ebé hein hela atu hetan aprovasaun no hetan apoia finansiamentu sira. Atividade ne’ebe nia pedidu hatama tiha ona kobre atividade ba rádiu komunidade, mídia munisipál, no mós diálogu komunitária balu iha parte leste.
Ba prosesu ne’ebé DNPDML hala’o ona ne’e, SEKOMS orienta atu ekipa Tékniku profisionál sira tenke apoia di’ak liu tan DNPDML, hodi suporta DNPDML, bele raliza di’ak duni atividade ne’ebé planeia tiha ona iha ‘’matrix plan’’ ezekusaun programa DNPDML tinan 2021, liuliu iha ne’ebé sei hala’o iha fulan Fevereiru no fulan Marsu 2021.
Antes hakotu enkontru ne’e, SEKOMS mós deside tiha ona, sei hala’o fali enkontru tuir mai iha semana dahuluk fulan Abril 2021, ne’ebé ajenda sira fokus deit atu rona relatóriu realizasaun programa trimestre primeiru, Janeiru to’o Marsu 2021, ne’ebé fokus ba output ne’ebé produs ona husi atividade ne’ebé realiza iha trimestre dahuluk ne’e, no define estratejia no asaun sira ba realizasaun tan programa DNPDML iha trimestre daruak, fulan Abril to’o fulan Junu 2021.
Comment